Anulohet seanca në Këshillin e Prokurorëve, nuk diskutohet për shkarkimin e Kocevskit

 

Ndërkohë, dje Kryeministri, Hristijan Mickovski, njoftoi se procedura për shkarkimin e kryeprokurorit do të ndërpritet, për shkak të hetimit të tragjedisë në Koçan. Ai theksoi se prokurorëve duhet tu jepet mundësi për të kryer punën ndërsa paraprakisht e lavdëroi punën e prokurorisë sa I përket veprimeve dhe shtrirjes së hetimit për zbardhjen e rastit me tragjedinë në Koçan. Sa i përket qëndrimit të Mickovskit, kryetarja e Këshillit tha se për momentin nuk kanë pranuar as një shkresë nga Qeveria se ndalon procedura e shkarkimit.

 

Procedurën për shkarkimin e Kryeprokurorit, Ljupço Kocevski, Qeveria e ka iniciuar në shkurt të këtij viti ndërsa pas kalimit në seancë të qeverisë, më 4 mars, propozimi për shkarkim ka mbërritur në Këshillin e Prokurorëve Publikë. Sipas Ligjit për Prokurorët Publik, Këshilli i Prokurorëve Publikë ka afat prej 15 ditësh për të vendosur nëse do të japë mendim pozitiv apo negativ lidhur me propozimin për shkarkimin e Prokurorit Publik të Shtetit. Duke qenë se ky afat ka skaduar, tani Këshilli “shfrytëzon” afatin shtesë prej 15 ditëve, të cilat ligji i lejon nëse ka arsye të justifikuara për këtë. Ky afat duhet të përfundojë më 3 prill. Fjalën e fundit për shkarkimin e kryeprokurorit e kanë deputetët.