Osmani: Së shpejti data për konstituimin e Kuvendit

 

“Për momentin ekipi im ligjor është duke analizuar se sa mund të ketë nevojë për kohë për përgatitjen e kësaj seance, në mënyrë që kur të thirret seanca të jetë e suksesshme. Pra, të jetë i suksesshëm konstituimi i Kuvendit të Kosovës. Gjithçka do të bëhet brenda afatit kushtetues. Për momentin nuk mund të jap një datë, sepse dua të jem e saktë, por shumë shpejt do ta kemi.”, - deklaroi presidentja e Kosovës, Vjosa Osmani. 

 

 

Fituese e zgjedhjeve të 9 shkurtit ka rezultuar partia e kryeministrit Albin Kurti, Lëvizja Vetëvendosje, e cila ka fituar 48 mandate deputetësh. Kurti në paraqitjet e deritanishme është shprehur se do të formojë edhe Qeverinë e re. Por, kandidati për kryeministër nga Partia Demokratike e Kosovës, Bedri Hamza, partia e të cilit është radhitur e dyta duke fituar 24 deputetë, ka thënë se është i gatshëm të marrë përgjegjësinë për formimin e Qeverisë me partitë opozitare, nëse dështon Lëvizja Vetëvendosje.

 

“Jemi në biseda edhe më LDK-në, AAK-në dhe partitë e tjera. Nëse vjen radha, unë jam i përgjegjshëm dhe i përkushtuar që vendit t’i japim institucionet. Me disa parti jemi në rregull, jemi në fazën e diskutimeve. Me LDK-në ende nuk kemi mbërri në atë fazë që të diskutojmë formulën e formimit të Qeverisë.”, - deklaroi Bedri Hamza nga PDK.

 

Hamza tha se me Lëvizjen Vetëvendosje deri në këtë moment nuk kanë komunikim zyrtar. Për formimin e Qeverisë së re nevojitet shumicë parlamentare prej të paktën 61 deputetësh. Në bazë të rezultateve përfundimtare krahas Vetëvendosjes, e cila ka siguruar 48 deputetë dhe PDK-së - 24, LDK-ja ka fituar 20 deputetë, AAK-ja - 5 deputetë dhe Nisma e Fatmir Limajt - 3 deputetë. Minoritetet kanë 20 deputetë edhe atë 10 minoritetet jo serbe, 9 Lista Serbe dhe një deputet partia serbe e udhëhequr nga zëvendës kryeministri aktual, Nenad Rashiq.