Aksidenti në Toranicë, Mitovski: Rrezikohet jeta e qytetarëve

 

“Raporti i testimit të cilësisë së ujit në Krivë Rekë tregon një rritje të jashtëzakonshme të koncentratave të substancave të dëmshme, dhe ajo që shqetëson më shumë është një rritje dhjetëfish të pranishmërisë dhe koncentratës së metaleve të rënda, konkretisht sasia e plumbit të pranishëm në ujë. Për disa qindra herë është rritur koncentrimi i cianidit, fosforit dhe azotit. Në këtë mënyrë është rrezikuar jeta e qytetarëve.”, - deklaroi kryetari i komunës së Kriva Pallankës, Sasho Mitovski. 

 

 

Nga Ministria e Mjedisit dhe Planifikimit Hapësinor njoftojnë se kompanisë “Bulmak”, e cila operon me minierën Toranica në Kriva Pallankë, i është shqiptuar gjobë prej 200 mijë eurove. Ministri Izet Mexhiti shprehet se nuk do të ketë tolerancë ndaj ndotësve.

 

“Kushdo që rrezikon mjedisin do të përballet me sanksione pa përjashtim. Kontrollet inspektuese do të vazhdojnë me ritme të intensifikuara dhe ministria do të insistojë në transparencë dhe llogaridhënie të plotë. Ky është vetëm një nga hapat e shumtë që po ndërmarrim për të garantuar një mjedis të pastër dhe të sigurt të të  gjithë qytetarëve.”, ka shkruar Mexhiti në rrjetin social Fejsbuk.

 

Ndotja është konstatuar pas inspektimit të jashtëzakonshëm të Inspektoriatit Shtetëror të Mjedisit më 24 mars.