Destinacionet më të mira për pushime këtë verë?

 

E para vjen si gjithmonë “Meka” e padiskutueshme e pushimit, Ibizza. Me ditët plot diell, hotelet fantastike e plazhet e mrekullueshme, ishulli i festave nuk zhgënjen kurrë.

 

Tulumi në Meksikë rekomandohet gjithashtu, nëse ju pëlqen një largim nga e zakonshmja dhe një zhytje në botën e një fshati, dikur stil hipish, sot të transformuar në një parajsë të vërtetë e të shumëkuotuar.

 

Marakeshi i Marokut, ku tërhiqeshin në rehati “Rolling Stones”-at gjatë viteve ’60, i ka rifituar kredencialet e një vendi magjepsës ekzotik. 

 

Si habitati i njerëzve më të bukur të botës, nuk është çudi që Rio de Zhaneiro i Brazilit rreshtohet edhe ai në listën e vendeve të nxehta të “fashionist”-ëve. E nuk i dihet sa njerëz të famshëm mund të ndeshni në tarracat e ndonjë hoteli luksoz atje, teksa jeni duke shijuar ndonjë koktej “caipirinha”.

 

I fundit, por jo për nga rëndësia, përmendet Majemi i Shteteve të Bashkuara, destinacioni i adhuruesve të festave, modës, yjeve të ekranit e të muzikës.

 

Ka nga të gjitha, njerëz të thjeshtë e princesha të kirurgjisë plastike, një larmi që nuk të mërzit kurrë, pa përmendur pastaj dhe klubet e famshme të natës.