Takimi Mickoski – Filipçe, BDI: A po bëhet modelimi një etnik i shtetit?

 

“A është “marrëveshja e re shoqërore” një vazhdimësi e koalicionit të oligarkisë Mickoski – Zaev? A përfaqëson kjo iniciativë fillimin e një riformatimi post-Ohër të modelit kushtetues të Maqedonisë së Veriut? Shqiptarët a po përjashtohen nga proceset thelbësore të vendimmarrjes? A është në këtë kuadër duke u diskutuar edhe mbrojtja e ndërsjellë nga përgjegjësia politike dhe ligjore – një lloj pakti joformal për mosndëshkim – për tragjedinë në Koçan, përballë tragjedisë së spitalit modular në Tetovë?” pyesin nga BDI.

 

 

Kryetari i LSDM-së, Venko Filipçe, mohon që LSDM të bëjë politika përçarëse në baza etnike dhe fton të gjitha partitë në takim liderësh.

 

“Periudhën që vijon duhet të vazhdojmë me organizimin e takimit të liderëve të kryetarëve të të gjitha partive të mëdha politike. Kjo është edhe një thirrje e imja deri tek të gjithë, përfshirë këtu edhe partitë e bllokut shqiptar. Nuk e shoh të nevojshme të ndahemi në parti të bllokut maqedonas dhe shqiptar kur flitet për interesin e shtetit. Në komitetin ekzekutiv të LSDM-së ka shqiptarë, maqedonas myslimanë dhe së shpejti do të jetë edhe një rome. Ne jemi parti multietnike dhe askush nuk e ka të drejtën të na fajësojë për politika etnike dhe nacionaliste.”, - theksoi kryetari i LSDM-së, Venko Filipçe.

 

BDI ka pyetur edhe koalicionin VLEN nëse është përfillur nga Mickoski për takimin e zhvilluar. Nga VLEN-i janë shprehur se nuk ka plane sekrete për të larguar shqiptarët nga askund dhe se gjitha këto janë spine politike të opozitës shqiptare.