Konjufca: Konsultim për konstituimin e Kuvendit

 

“Gjithçka shkoi mirë, u caktuan ulëset. Në mes ulet partia me më së shumti ulëse: Lëvizja Vetëvendosje. Dy krahët janë, siç kanë qenë PDK-ja dhe LDK-ja. AAK-ja u deklarua që ulet vetë ashtu, siç ka qenë.”, - deklaroi kryetari në detyrë i Kuvendit, Glauk Konjufca.

 

 

Ndërkohë Albulena Haxhiu, nga Lëvizja Vetëvendosje, bëri të ditur se në kuadër të bisedimeve për Qeverinë e re, çështja e kryeministrit është e panegociueshme, ndërsa mund të negociohet çështja e kryeparlamentarit. 

 

“Kurti ka ftuar për takim LDK-në për nesër apo pasnesër, janë dy ditë në disa orare. Qëllimi është konstituimi i Kuvendit duke pasur parasysh që nuk konsiderohet që Kuvendi i Kosovës është konstituuar pa u zgjedhur kryetari dhe nënkryetarët e saj. Ajo që dihet tani për tani është emri i kryeministrit. Nuk dihen emrat e personave të tjerë, të cilët do të mbajnë pozicione të tjera, qoftë në Qeveri apo Kuvend, por ajo që dihet është se kryeministër do të jetë Albin Kurti dhe Qeveria e Kosovës do të votohet shumë shpejt.”, - theksoi Albulena Haxhiu nga Vetëvendosja.

 

 

Qëndrimi i LDK-së është që sa më parë të krijohen institucionet, duke respektuar afatet ligjore, thotë nënkryetarja e LDK-së, Doarsa Kica Xhelili. Ajo tha se i mbetet kryetarit të partisë, Lumir Abdixhiku të vendosë nëse do t’i kthejë apo jo përgjigje kryetarit të LVV-së, Albin Kurti, i cili e ftoi në një takim këtë javë. 

 

“Sikurse e keni parë, letra i është drejtuar kryetarit të Lidhjes Demokratike të Kosovës, Lumir Abdixhikut dhe rrjedhimisht mbetet te z. Abdixhiku të kthejë përgjigje zyrtare apo të mos kthejë përgjigje zyrtare, në raport se a e pranon një ftesë të tillë për diskutim ose jo. Kjo nuk nënkupton asgjë në raport me qëndrimet tona karshi Lëvizjes Vetëvendosje.”, - u shpreh Doarsa Kica Xhelili nga LDK.

 

 

Nënkryetari i PDK-së, Uran Ismaili, thotë se pozicioni i PDK-së është se kandidati i saj për kryeministër, Bedri Hamza, mund ta krijojë Qeverinë, nëse këtë dështon ta bëjë LVV-ja. 

 

“Unë e kam bindjen se në qoftë se ka një paaftësi të partisë së parë për ta realizuar Qeverinë, unë kam një bindje që z. Hamza është një person mjaft i aftë për ta ndërtuar një koalicion që e ka në fokus atë që e ka premtuar: zhvillimin ekonomik, përmirësimin e mirëqenies së qytetarëve dhe mendoj që është një person që pranohet nga një shumicë e mjaftueshme në Kuvend, atëherë kur i vjen rasti.”, - deklaroi Uran Ismaili nga PDK.

 

Me qëllim të konstituimit të plotë të Kuvendit të Republikës së Kosovës dhe procesit të zgjedhjes së Qeverisë së re, kryetari i Lëvizjes Vetëvendosje, Albin Kurti, ka ftuar për takim të mërkurën, më datë 9 prill apo të enjten, më datë 10 prill. Paraprakisht Kurti ka realizuar takime me partitë e minoritetit jo serb dhe me kryetarin e Nismës, Fatmir Limaj.