Tragjedia e Koçanit, 4 pacientë kthehen nga kurimi jashtë vendi

 

“Kemi ofertë nga Franca për trajtim të dy pacientëve në bazë të nevojave që i kanë në qendrat kryesore, që kanë përvojë me lëndime të këtilla të pacientëve. Kemi kontakte me ekipe nga Britania që ishin këtu dhe i panë kushtet për rehabilitim që i kemi në institucionet tona dhe na dhanë vërejtje të caktuara se çfarë duhet të korrigjojmë. Klinika e Psikiatrisë bashkë me psikologët janë të kyçur në trajtim dhe përcjelljen e pacientëve përderisa ndjejnë nevojë të konsultojnë psikiatër dhe psikolog dhe kjo nuk domethënë të jetë në kryeqytet, të munden të shkojnë në tjetër qytet, si në Shtip.”, - deklaroi anëtari në Shtabin e Krizës në Shëndetësi, Igor Nikollov.

 

Në Klinikën për djegie dhe kirurgji plastike trajtohen 4 pacientë në gjendje kritike. Mjekët thonë që u nevojitet periudhë më e gjatë për t’u trajtuar.

 

“Trajtimi është i gjatë, rikuperimi me lëndime të mëdha është 1 vit e gjysmë deri në 2 vite. Nëse i shtojmë edhe operacionet rekonstruktive, periudha mund të zgjasë 5 deri në 7 vite, kështu që trajtimi nuk përfundon me lëshimin e pacientëve nga Klinika, por vazhdon në shtëpi.”, - theksoi Maja Argirova nga Klinika për djegie dhe kirurgji plastike “Pirogov”.

 

Nga tragjedia e Koçanit jetën e humbën 61 të rinj, rreth 200 të tjerë u lënduan.