MASh, strategji për arsimin e të rriturve

 

“Strategjia do të mundësojë produktivitet më të madh të popullsisë dhe zhvillim më të madh të të gjithë shoqërisë sonë. Strategjia bazohet në konceptimin e mësimit gjatë gjithë jetës, që është me shumë rëndësi për ta aktivizuar grupmoshën e mesme të qytetarëve, të rritur dhe të papunësuar në vend dhe përfitimin e aftësive të ndryshme, të cilët i kërkon koha e re dhe tregu i punës, si dhe sfida e proceseve demografike. Për fat të keq popullsia jonë po plaket, nataliteti është i ulët dhe ne duhet të ndërmarrim masa me të cilën do të përmirësojmë produktivitetin e popullsisë sonë.”, - deklaroi ministrja e Arsimit dhe Shkencës, Vesna Janevska.

 

“Qëllimi kryesor i strategjisë së re është zbatimi i vlerave dhe proceseve arsimore evropiane në sistemin tonë arsimor, respektivisht t’i implementojnë politikat dhe praktikat më të mira evropiane në mesin e personave të rritur tek ne përmes arsimit joformal e deri në arsimin formal. Si drejtor i ri do të angazhohem në mënyrë të denjë që të zbatohet e gjithë strategjia.”, - theksoi drejtori i Qendrës për arsimin e të rriturve, Sadudin Sadiki. 

 

Arsimi joformal do të zbatojë Qendra për arsimin e të rriturve, ku parashihen lloj-lloj trajnimesh për të gjithë qytetarët e rritur, e që janë pa punë e që dëshirojnë të kyçen në tregun e punës. Strategjia është e përpiluar me ndihmën e BE-së, tha Janevska, duke thënë njëherit se e njëjta është me rëndësi të madhe për t’i implementuar reformat në arsim.