Komuna e Tetovës, qytetarët kërkojnë ndryshimin e emrave të rrugëve

Në komunën e Tetovës ka mbi 250 rrugë, ku shumica e tyre janë pa emra dhe pa numra. Qytetarët e anketuar nga TVM2 thonë se emrat e rrugëve duhet ndryshuar, pasi të njejtët janë që nga sistemi Jugosllavë.

“Duhet ndryshuar por kush. Debate ka plotë, por asgjë nuk mund të vendosin” - u shpreh një banor.

“Duhet, por nuk janë duke u ndryshuar. Mendojmë, por a do bëhet, atë nuk e dijmë” - tha një banor tjetër i Tetovës.

“Ka rrugë pa emra, vetëm me numra, asnjë orinetim nuk mund të kesh, nuk mundta gjeshë rrugën. Duhet ndryshuar, ne të vendoset njëherë e mirë” - deklaroi një qytetar tetovar.

“Duhet të ndryshohen, po po duhet. Çfarë emra ka deri më tani, të atyre ‘ Samarxhive’” – u shpreh një tjetër qytetar tetovar.

Kryetari i komunës së Tetovës Bilall Kasami tha se ky proces është për të mirën e qytetarëve dhe i njejti duhet të përkrahet nga të gjithë.

“Çdo propozim i qytetarëve është i rëndësishëm dhe ndihmon që ky proces të jetë gjithëpërfshirës dhe i suksesshëm për qytetarët dhe qytetin e Tetovës. Bashkë, hapur, në mënyrë transparente diskutojmë dhe japim propozime” - tha Kryetari i komunës së Tetovës, Bilall Kasami.

Nga ana tjetër kryetari i grupit të punës, Argjend Veliu, tha se në debatin e kaluar publik janë pranuar rreth 45 propozime.

“Shpresojmë që intensiteti i propozimeve të jetë i njëjtë edhe në debatin e sotëm. Në bazë të një marrëveshje të brendshme” – u shpreh Argjent Veliu nga Komuna e Tetovës.

Kundër ndryshimit të emrave të rrugëve në Tetovë janë të gjithë këshilltarët maqedonas, që janë pjesë e këshillit komunal, të cilët nuk ishin prezent edhe gjatë debatit publik. (Visar Sadiku, TVM2)