Tragjedia në Koçan, 10 pjesëtarë të policisë nën hetim

 

"Sipas përshkrimit të urdhrit për kryerjen e procedurës hetimore, të dyshuarit si zyrtarë të punësuar në SPB-Shtip dhe SPB-Koçan, gjatë periudhës së lartpërmendur, si bashkëkryerës nuk kanë vepruar në përputhje me rregulloren për masat mbrojtëse, nuk kanë bërë kontroll të plotë dhe të detajuar lidhur me dhënien e pajtueshmërisë pozitive për dhënien e licencës për kabarenë "Puls", në fushën e sigurisë në komunikacion dhe rendit publik. Me dhënien e pëlqimeve, të gjithë së bashku i kanë mundësuar personit juridik që të marrë licencë për kryerjen e veprimtarisë hotelierike edhe pse nuk i plotësonte kushtet e parapara.", njoftojnë nga Prokuroria Publike.

 

Ministria e Brendshme ka bërë të ditur se gjashtë prej punonjësve të policisë janë privuar nga liria, një është në kërkim dhe tre prej tyre aktualisht janë duke mbajtur masën e paraburgimit.

 

“Me kryerjen e veprimeve të mësipërme, zyrtarët e paditur i kanë mundësuar personit juridik “Classic DM” nga Koçani marrjen e licencës për kryerjen e veprimtarisë hotelierike – kabare “Puls” në Koçan, në mënyrë që nuk kanë vepruar në përputhje me rregulloret për masat mbrojtëse dhe nuk kanë bërë kontroll të plotë para dhënies së pëlqimit pozitiv për licencimin e kabaresë, duke shkaktuar kështu rrezik për jetën dhe trupin e njerëzve në një vend ku grumbullohet një numër i madh njerëzish.”, - deklaroi zëdhënësi i MPB-së, Goce Andrevski.

 

Si pasojë e zjarrit të shkaktuar në diskotekën në Koçan më 16 mars, humbën jetën 61 persona, ndërsa rreth 200 mbetën të lënduar. Në hetim marrin pjesë 11 prokurorë, ndërsa deri më tani të dyshuar janë 59 persona fizikë dhe 3 persona juridikë. Prej tyre 14 persona janë zyrtarë policorë.