JD Vance udhëton drejt Italisë dhe Indisë, takime me kryeministrat Meloni dhe Modi

Zëvendëspresidenti amerikan JD Vance është gati të fillojë një udhëtim në Itali dhe Indi të premten – duke shënuar udhëtimin e tij të tretë ndërkombëtar me administratën Trump.

 

Në Romë, është planifikuar që Vance të takohet me Kryeministren e Italisë Giorgia Meloni dhe Sekretarin e Shtetit të Vatikanit, Kardinalin Pietro Parolin; ndërkohë, Meloni është planifikuar gjithashtu të vizitojë Shtëpinë e Bardhë javën e ardhëshme në Uashington.

 

Në Indi ai do të takohet me Kryeministrin e Indisë Narendra Modi gjatë vizitës në New Delhi, Jaipur dhe Agra. Është planifikuar që Zëvendëspresidenti të zhvillojë vizita edhe në disa vende të tjera. Zyra e tij nuk dha detaje specifike në lidhje me këto vende, sipas Fox.

 

Kjo vjen ndërsa Shtëpia e Bardhë ka thënë se më shumë se 75 vende kanë kontaktuar duke kërkuar të negociojnë marrëveshje tregtare me SHBA-në, pasi administrata Trump shpalli tarifat historike më 2 prill.

 

Si Bashkimi Evropian ashtu edhe India kanë sinjalizuar interes për të ndërmjetësuar një marrëveshje me SHBA-në për tregtinë. Meloni ka thënë se Italia nuk është dakord me tarifat e vendosura ndaj BE-së dhe është e përgatitur të “përdorë të gjitha mjetet” për të mbrojtur bizneset italiane.

 

Plani origjinal tarifor vendosi 20% taksa për mallrat nga Bashkimi Evropian, si dhe të paktën 26% taksa për mallrat indiane. Megjithatë, Trump njoftoi më 9 prill një pauzë 90-ditore të këtyre tarifave, ku detyrimet do të reduktoheshin në 10%, ndërsa vendet punojnë për të arritur marrëveshje tregtare me SHBA-në.

 

Udhëtimet e mëparshme ndërkombëtare të Vance përfshijnë pjesëmarrjen në Konferencën e Sigurisë së Mynihut në shkurt, ku ai mbajti fjalime duke e nxitur Evropën të “përparojë në një mënyrë të madhe për të siguruar mbrojtjen e saj”. Ai gjithashtu paralajmëroi se Rusia dhe Kina nuk përbëjnë një kërcënim aq të madh për kombet evropiane sa “kërcënimi nga brenda”, në lidhje me çështje si censura dhe imigracioni i paligjshëm.

 

Në mars, Vance vizitoi Bazën Hapësinore Pituffik në Groenlandë, instalimin ushtarak më verior të Departamentit të Mbrojtjes që strehon Grupin e 821-të të Bazës Hapësinore të Forcës Hapësinore për të kryer operacione paralajmërimi për raketa, mbrojtje nga raketat dhe mbikëqyrje hapësinore.