Shkup, shënohet Dita Kombëtare e Holokaustit

 

 

“24 Prilli, sipas kalendarit hebraik, është dita përkujtimore e heroizmit të Holokaustit. Shteti i Izraelit dhe të gjithë hebrenjtë nëpër botë përkujtojnë me nderime vdekjen e 6 milionë hebrenjve, që u vranë nga regjimi nazist i Gjermanisë Hitleriane dhe satelitëve të tyre fashistë. Prej 11 mars të vitit 2011 kur u hap qendra jonë memoriale, ky vend përfaqëson luftën kundër çdo lloj diskriminimi, qoftë ai racor, fetar apo çfarëdo lloj dallimi tjetër.”, - deklaroi kryetari i komunitetit hebre në RMV, Pepo Levi.

 

Ndërkohë, ambasadori i Polonisë në RMV, Mariush Brimora, solli në vëmendje traditën që zhvillohet çdo 19 prill në Varshavë, në përkujtim të Kryengritjes së Getos, një akt i guximshëm i hebrenjve në vitin 1943 për të kundërshtuar deportimin drejt kampeve të vdekjes.

 

“Çdo vit, mijëra lule dafinash shfaqen në rrugët e Varshavës. Ka dafina të vërteta që banorët dhe vizitorët e kryeqytetit polak vendosin pranë memorialeve dhe dafina letre të vogla që çelin në xhaketat e kalimtarëve. Cili është kuptimi i këtyre luleve të verdha, mund të pyesni, dhe si na ndihmojnë të kujtojmë? Mark Edelman, udhëheqësi i fundit i kryengritjes në Geton e Varshavës, i cili mbijetoi nga lufta dhe jetoi në Poloni deri në vdekjen e tij në vitin 2009, merrte çdo vit një buqetë me lule të verdha, kryesisht dafina, nga një person anonim. Ai më pas i vendoste ato pranë Monumentit të Heronjve të Getos në kujtim të atyre që luftuan.”, - theksoi ambasadori i Republikës së Polonisë në RMV, Mariush Brimora. 

 

Tradicionalisht, çdo vit në këtë ditë hapet një ekspozitë e artit figurativ të nxënësve, pjesëmarrës në konkursin për çmime “Holokausti përmes prizmit të syve të fëmijëve”, i shpallur nga Fondi i Holokaustit të Hebrenjve të Maqedonisë dhe Qendra Memoriale e Holokaustit të Hebrenjve nga Maqedonia.

 

Përmes këtij përkujtimi, komuniteti ndërkombëtar riafirmon rëndësinë e kujtesës historike dhe përkushtimin për paqe, liri dhe barazi në mbarë botën.