27 prilli, tetë vite nga ngjarjet e dhunshme në Kuvend

 

Ndër më të goditurit ishte kryetari i ASh-së Ziadin Sela. Ai sot përkujtoi ngjarjet e tmerrshme që për pak sa i morën jetën, ndërsa kritikoi qasjen e qeverisë, që sipas tij, i amniston dhunuesit. 

 

“A ka ngelur ndonjë prej atyre të cilët u dënuan për 27 prillin sot në burg. Nuk besoj që ndonjë ka ngel aty. Përkundrazi duan t’i shndërrojnë dhe t’i kthejnë si hero. Ndërkohë që 27 prilli ishte momenti kur u tentua të vritet ASh si koncept politik, por përkundrazi iu dha jetë dhe po të njëjtit aktorë kanë marrë jetë politike nga ndodhitë e 27 prillit.”, u shpreh kryetari i ASh-së, Ziadin Sela.

 

Ndërkohë, LSDM vlerëson se 27 prilli është data më e zezë në historinë e demokracisë maqedonase. 

 

“Banditë të armatosur hynë me forcë në Parlament me qëllim vrasjen e deputetëve, gazetarëve dhe oficerëve të policisë, duke e çuar vendin në prag të luftës civile. LSDM, së bashku me qytetarët, nuk do të lejojë që e ‘Enjtja e Përgjakshme’ të harrohet, nuk do të lejojë që 27 Prilli të përsëritet kurrë”, thotë partia.

 

Reagojnë nga VMRO-DPMNE duke thënë se çdo akt dhune duhet të sanksionohet, por edhe padrejtësitë, poshtërimet dhe tradhtitë e LSDM-së nuk duhet të harrohen. 

 

“27 prilli nuk do të harrohet, por as dita kur LSD-ja tradhtoi Maqedoninë. Megjithatë, kryengritja popullore për akte të tilla të pabesa dhe të paharrueshme do të mbetet e shkruar në analet e historisë maqedonase, sepse dikush që duhej ta kishte mbrojtur Maqedoninë, më vonë foli publikisht se mbështeste kantonizimin, federalizimin, shpërfytyrimin dhe poshtërimin e Maqedonisë”, theksojnë nga VMRO-DPMNE. 

 

Përndryshe për këtë rast është shqiptuar dënim i përgjithshëm me burg prej 211 viteve 16 të akuzuarve për dhunën në Kuvend më 27 prill të vitit 2017.