Sela: S’jam takuar me Mickoskin, nëse takohemi, flasim ndryshimin e kushtetutës

 

“Assesi nuk dua të diskutojë ato që i dëgjojmë nga eksponentët e VMRO-së nëpër media që sillen si tregtarë me të drejtën tonë. Kushtëzojnë një të drejtë tonën me një të drejtë tjetër tonën. Po, thonë, gjuha shqipe mund të futet në Kushtetutë, por ne për këtë duam ndarje të re territoriale, ta marrim Strugën, ta marrim Kërçovën. Por ne kemi të flasim një çështje tjetër shumë të rëndësishme. Për çdo ligj që sillet në Kuvend me Badinter, vendimi në Gjykatën Kushtetuese të merret me Badinter.”, u shpreh kryetari i Aleancës për Shqiptarët, Ziadin Sela.

 

 

Sela gjithashtu mohoi bashkëpunimin me VLEN-in në rast të daljes së Taravarit nga ky koalicion, duke thënë se nuk mendon të hyjë në aventura të tilla. Megjithatë bëri thirrje që i gjithë faktori politik shqiptarë të bashkohet me kërkesa të përbashkëta për realizimin e te drejtave shqiptare në Maqedoni të Veriut. 

 

“Unë jam për bashkim të faktorit politik shqiptarë për tu bërë të qarta në letër pesë gjëra që ne duhet ti realizojmë dhe për ti dhënë fund dhe ta ndërpresim këtë mësymje të faktorit politik maqedonas në qeveri, dhe jo vetëm, iu bëjnë të drejtave të shqiptarëve dhe qenies shqiptare këtu në Maqedoni të Veriut.”, tha Sela.

 

Përndryshe, mundësia e përfshirjes së ASH-së së Ziadin Selës në koalicion qeveritar është përfolur pas ndodhive në VLEN, ku ASh e Arben Taravarit vendosi që të garojë e vetme në zgjedhje lokal, pas çka krerët e VLEN-it konstatuan, siç thanë, vetë-përjashtimin e Taravarit nga VLEN-i.