Taravari: I urojmë suksese VLEN-it

 

“Ne ju urojmë suksese, gëzohem që u bashkuan 3 parti në 1 parti, urojmë që të bëjnë rezultate sa më të mira. Ne tash për tash dalim me lista të veçanta, me shumë gjasa edhe me kandidatë të veçantë.”, - deklaroi kryetari i ASh-së, Arben Taravar.

 

 

Deputeti që është pjesë e njërës prej fraksioneve të Aleancës për Shqiptarët të Arben Taravarit, Halil Snopçe, ka theksuar se nëse partia e tij del nga Qeveria, atëherë janë të nevojshme zgjedhje të parakohshme parlamentare, për shkak se Qeveria do të jetë e paqëndrueshme dhe pa legjitimitet.

 

"Pa dyshim që Qeveria i ka numrat edhe pa Aleancën për Shqiptarët, por do të jetë e paqëndrueshme me vetëm nëntë deputetë shqiptarë.", - theksoi deputeti i ASh-së, Halil Snopçe.

 

Pas deklaratës së deputetit Snopçe kanë reaguar nga VMRO-DPMNE. Nga atje theksojnë se jozyrtarisht kanë shumicë prej dy të tretave, mbi 80 deputetë. Deputeti i kësaj partie, Bojan Stojanovski, është i vendosur se partia e tij është e gatshme për zgjedhje të parakohshme parlamentare në çdo moment, por, siç tha ai, ato nuk do të mbahen së bashku me zgjedhjet lokale në vjeshtë.

 

“Edhe nëse ndodh një situatë e tillë, Qeveria do të funksionojë krejtësisht normalisht dhe më mirë se më parë.”, - u shpreh deputeti i VMRO-DPMNE-së, Bojan Stojanovski.

 

Përçarja në koalicionin VLEN tashmë po pasqyrohet edhe në Kuvend. Pas ndarjes së ASh-së së Taravarit nga koalicioni, Halil Snopçe pritet të zëvendësohet nga Bekim Qoku, si koordinator i Grupit Parlamentar të VLEN-it. Snopçe deklaroi se nuk është i informuar për vendimet e fundit, pasi si parti nuk ishin të ftuar në takimin e mbrëmshëm të koalicionit.

 

"Unë nuk e di çfarë vendimesh janë marrë në atë takim dhe nuk kam asnjë konfirmim zyrtar nga shërbimet e Kuvendit se 9 deputetë nga gjithsej 14 të VLEN-it kanë paraqitur kërkesë për një grup të veçantë parlamentar. Derisa të kem një informacion të tillë, nuk mund të komentoj. Por, nëse kjo ndodh, atëherë automatikisht implikon edhe krijimin e një grupi parlamentar të Aleancës për Shqiptarët me pesë deputetë.", - deklaroi deputeti i ASh-së, Halil Snopçe.

 

Ndryshimi i koordinatorit të grupit parlamentar të VLEN-it pason pasi koalicioni dje shpalli një moratorium për të gjitha aktivitetet publike politike të partive që e përbëjnë atë dhe njoftoi se nga tani do të veprojë si një subjekt i vetëm politik, pra si parti. Bekim Qoku është deputet i pavarur nga Lëvizja Vetëvendosje, i cili garoi në zgjedhje me koalicionin VLEN dhe pas përçarjes mbeti në grup me Izet Mexhitin, Bilall Kasamin dhe Zeqirija Ibrahimin.