Vrasja në Shtip, LSDM: Përgjegjësia është e Toshkovskit

Pas ngjarjes tragjike në Shtip ka reaguar LSDM. Sipas tyre, vrasja në Shtip ngre pyetje serioze për sigurinë publike.

Nga LSDM pyesin se si është e mundur që një shtetas i huaj të posedojë armë zjarri dhe të arratiset i armatosur nëpër rrugët e qytetit? Përgjegjësia për këtë, sipas LSDM-së, bie mbi ministrin e Brendshëm, Toshkovski, i cili po e humb kontrollin mbi rendin dhe sigurinë në vend.

“Si është e mundur që një shtetas i ri turk të posedojë pistoletë. I kujt është automjeti me të cilën është arratisur dhe ka gjuajtur edhe në pikën pagesore?! Kush e ka lejuar këtë katrahurë ose e thënë ndryshe, kush e ka lejuar këtë anarki, kaos të përgjithshëm nëpër rrugët e qytetit?! Nuk ka  ditë pa pasur vrasje, përleshje, qytetarët druajnë për sigurinë e tyre. Kjo është dëshmi se ministri i Brendshëm, Toshkovski, po e humbet kontrollin mbi sigurinë në vendin tonë.”, - deklaroi zëdhënësja e LSDM-së, Bogdanka Kuzevska.

VMRO-DPMNE: Qeveria është e vendosur ta luftojë krimin

Janë kundërpërgjigjur nga VMRO-DPMNE. Sipas tyre, koha e kaosit në vend dhe shkëmbimeve të zjarrit nëpër qytet ka përfunduar me largimin e LSDM-së në opozitë.

“Gjatë sundimit të tyre shtatëvjeçar, LSD-ja e shndërroi vendin në një strehë mafioze dhe një zonë të lirë për kriminelët ndërkombëtarë dhe bosët e drogës. Oliver Spasovski, si ministër i Brendshëm, në vend që të ndiqte penalisht krimin, ai u dha pasaporta maqedonase 215 kriminelëve botërorë. Pas një kohe të gjatë, kemi një Qeveri të vendosur të shkojë deri në fund në betejën kundër krimit.”, thuhet në reagimin e VMRO-DPMNE-së. (Armend Murseli, TVM2)