ASh kalon në opozitë, Taravari: s'duam të jemi “kukull” në Qeveri

 

 

“Sollëm vendim që Aleanca për Shqiptarëvt të shkon në opozitë. Vitin e kaluar së bashku me partitë e VLEN-it arritëm që ta sjellim ndryshimin, por ky ndryshim nuk është ai ndryshim që e premtuam por vetëm një zëvendësim. Ne u munduam këto një muaj e gjysëm që të gjejmë një gjuhë të përbashkët që përpos asaj që dalim me lista të veçanta për këshilltar, të gjejmë gjuhë të përbashkët për përkrahje me kandidatët për kryetar komunash që do ti nxjerr VLEN-I, por konstatuam se nuk gjejmë aty gjuhë të përbashkët, praktikisht është e pamundshme dhe Aleanca për Shqiptarët nuk ka besim të ndërsjellë mes partive të koalicionit në Qeveri, dhe kur ka dyshime dhe konspiracione nuk i mbetet gjë përveç të mos jetë pjesë e atyre dyshimeve dhe konspiracioneve”, u shpreh kryetari i Aleancës për Shqiptarët, Arben Taravari.

 

 

Nga VLEN-i theksojnë se mbeten të përkushtuar në realizimin e premtimeve dhe përfaqësimin e shqiptarëve. 

 

 

 

Në Qeveri nuk ka vend për bashkëpunëtorë të BDI-së. Kështu janë përgjigjur nga VMRO-DPMNE, sa i përket paralajmërimit për largimin e Taravarit nga Qeveria. Vlerësojnë se koalicioni qeveritar është stabil dhe ka shumicë parlamentare.

 

“Qeveria është stabile dhe për këtë nuk ka dilemë askush. Kemi mbështetje serioze nga pothuajse 2/3 e deputetëve dhe kjo do të vërtetohet shumë shpejt përmes procedurave të caktuara kuvendore. Ajo që është e rëndësishme është se duam që të japim porosi se në Qeveri nuk ka vend për bashkëpunëtorë të BDI-së.”,  - theksoi Brane Petrushevski nga VMRO-DPMNE.

 

 

Në pyetjen se çfarë komunikimi ka me deputetët e Aleancës dhe nëse ka paralajmërime se dikush do të qëndrojë në këtë shumicë qeveritare, përgjigjen nga Lëvizja "E di".

 

“Aleanca për shqiptarët nuk morën pjesë në koordinimin e sotëm dhe nuk është mirë të përgjigjem se çfarë do të ndodhë me deputetët. Një subjekt politik nga 4, që morën pjesë me VLEN-in, mbeten 3 parti të bashkuara në një subjekt politik VLEN. Kjo parti është gjithçka, por jo monoetnike.”, - u shpreh Vesna Bendevska nga Lëvizja “E di".

 

 

Bashkimi Demokratik për Integrim akuzon se largimi i një partneri shqiptar nga Qeveria krijon shumicë politike pa legjitimitet etnik, duke e shndërruar atë në një Qeveri monoetnike. Nga kjo parti vlerësojnë se është koha për zgjedhje të parakohshme parlamentare. "Çdo ditë që kjo Qeveri refuzon kërkesat e shqiptarëve, është një ditë më shumë në largimin e shqiptarëve nga proceset shtetërore. Kjo shumicë parlamentare ka dështuar në interesat strategjike kyçe të shtetit dhe për këtë po shpërbëhet. Është koha që legjitimiteti i përfaqësuesve politikë të rivlerësohet përmes zgjedhjeve të parakohshme parlamentare.".

 

Pas kërkesave të BDI-së për mbajtje të zgjedhjeve të parakohshme, nga VLEN-i ndajnë qëndrimin se zgjedhjet e vetme që do të mbahen janë ato lokale, në të cilat sipas tyre do të sillet ndryshimi, do të mposhtin krimin, korrupsionin dhe paaftësinë qeverisëse të BDI-së dhe funksionarëve të saj përgjatë këtyre 23 viteve.