Maqedoni

Largimi i Taravarit nga Qeveria, Selmani: Ka shumë të panjohura

13.05.2025 14:51

Selmani për TVM2 ka theksuar se vendimi i Taravarit është i çuditshëm dhe se duhet të studiohen veprimet mbrapa perdeve...

Deklarimi i Aleancës për Shqiptarët i kryesuar nga Arben Taravari, se largohen nga Qeveria, ka ngritur dyshimet edhe më shumë, se megjithatë partitë politike, sidomos ato opozitare, janë duke u përgatitur që së bashku me zgjedhjet lokale të mbahen edhe zgjedhjet e parakohshme parlamentare. Por, këtë ide dhe kërkesë të partive opozitare e kanë hedhur poshtë partitë në pushtet, të cilët vazhdojnë të këmbëngulin se Qeveria është stabile dhe se largimi i ASh-së nga Qeveria nuk mund ta dërgojë vendin në zgjedhje të parakohshme parlamentare. Por, profesori universitar, Bashkim Selmani, për TVM2, ka theksuar se ky vendim i Taravarit është i çuditshëm dhe se duhet të studiohen veprimet mbrapa perdeve të cilat bëhen dhe të shihet se nga kush është i shtyrë.   

 
“Lëvizjet e Taravarit janë për t’i studiuar për arsye se është rast i veçantë, sepse gjithmonë subjektet pretendojnë të futen në Qeveri dhe as që e lëshojnë me asnjë çmim Qeverinë dhe ky që e lëshon Qeverinë, ne thjesht nuk e dimë, po as vet Taravari nuk është shprehur. Prandaj, them se ka shumë të panjohura, por thjesht janë indikacione pas perdeve. Por, gjithçka që aktualisht ndodh, nuk është në interesin e ngritjes së dinjitetit të qytetarëve.”, - theksoi profesori universitar, Bashkim Selmani.
 
Ideja për zgjedhje të parakohshme, Selmani: Janë humbje kohe
 
Selmani po ashtu është shprehur se pak me rëndësi është se a do të shkojë vendi në zgjedhje të parakohshme parlamentare apo jo, sepse sipas tij, zgjedhjet janë humbje kohe dhe zgjedhjet jo që zgjedhin problemet reale të qytetarëve, por se në vendin tonë gjithçka është e mundur, sepse pas perdeve siç duket ka qarkullime të tjera.
 
“Shpesh në opinion kërkohen zgjedhje të parakohshme, por kjo thjesht është humbje kohe. Çdo gjë është e hapur dhe e mundshme dhe çdo gjë do të bëjnë subjektet politike vetëm për ta ç’orientuar opinionin nga problemet reale të qytetarëve, prandaj them se të gjitha këto janë të pritshme, edhe zgjedhjet e parakohshme, por nuk do të zgjedhin probleme. Kjo është pjesa me të cilën i detyron subjektet të bëjnë hyrje-dalje në Qeveri dhe gjithë këto nuk di se nga kush janë të koordinuar dhe pas perdeve siç duket ka qarkullime të tjera nga ana që u premtohet votuesve.”, - deklaroi profesori universitar, Bashkim Selmani.
 
Njohësit e mirë të çështjeve politike po ashtu theksojnë se pretendimet e koalicionit VLEN dhe të vet Taravarit, se prishja e raporteve të tyre janë moskoordinimi për listat e këshilltarëve komunalë. Këto janë vetëm arsye të pabaza, por problemi qëndron diku tjetër, që koha më së miri do t’i tregojë qëllimet e gjithsecilit. 
 
FITIM KRYEZIU