Maqedoni
Ahmeti: BDI do ta mbrojë Kërçovën, kuadrot shqiptare do të vazhdojnë të drejtojnë
14.05.2025 12:28
BDI do ta mbrojë Kërçovën dhe kjo komunë do të vazhdojë të udhëhiqet nga kuadro shqiptare..
BDI do ta mbrojë Kërçovën dhe kjo komunë do të vazhdojë të udhëhiqet nga kuadro shqiptare, theksoi sekretari i përgjithshëm i BDI-së, Faton Ahmeti, në një intervistë për emisionin ZOOM në TVM2. Sekretari i përgjithshëm i BDI-së, Faton Ahmeti, u pyet nëse në zgjedhjet e ardhshme lokale mund të humbet Kërçova, Ahmeti u përgjigj me vendosmëri se kjo nuk do të ndodhë, pasi komuna e Kërçovës është fituar nga BDI, së bashku me shqiptarët e Kërçovës dhe ata nga diaspora dhe për këtë arsye shqiptarët e Kërçovës do ta fitojnë përsëri këtë komunë.
“Komuna e Kërçovës në çdo cikël zgjedhor është fituar nga BDI me mbështetjen e shqiptarëve, me mbështetjen e kërçovarëve, por edhe të diasporës kërçovare, e cila ka qenë jashtëzakonisht e interesuar që kjo komunë të mos rrezikohet dhe sigurohuni se të njëjtën gjë do ta bëjmë përsëri.”, theksoi Ahmeti.
Ai nuk e përjashtoi mundësinë e bashkëpunimit me të gjitha partitë politike shqiptare në zgjedhjet lokale në komunën e Kërçovës, me qëllim që të mos ndahen votat shqiptare.
“Ne jemi të interesuar që në komunat ku ekziston potencial për të fituar një kandidat shqiptar, të bashkohet vota, të mos ndahet dhe të arrijmë që ato të drejtohen nga kuadro shqiptare.”, tha sekretari i përgjithshëm Ahmeti, në emisionin ZOOM.