Zhvillimet në bllokun politik shqiptar, Mexhiti: Kemi 13-14 deputetë

 

“Unë mendoj se pjesa dërmuese e anëtarësisë së Aleancës do të mbetet në VLEN. Ata e kanë derën hapur në VLEN, ata kanë kontribuar për këtë fitore, kanë kontribuar për ndryshime dhe nëse dikush i ka borxh BDI-së dhe Ahmetit mund të vazhdojë të shkojë tek Ahmeti, por pjesa dërmuese e Aleancës besoj që do të mbetet brenda VLEN-it. Ende pa përfunduar epilogu me Aleancën, unë e them edhe sot se Qeveria ka numrin e njëjtë të deputetëve, aq sa ka pasur edhe me Taravarin.”, - deklaroi zëvendëskryeministri i parë, Izet Mexhiti.

 

 

Por, kryetari i ASh-së, Arben Taravari, në një intervistë për gazetën Nacionale e thotë të kundërtën, se blloku shqiptar në pushtet ka ngelur me 9 deputetë, duke vënë në diskutim edhe legjitimitetin e Qeverisë. Madje Taravari mohon që për braktisjen e Qeverisë të ketë gisht BDI dhe Ahmeti.

 

“Nuk e di pse është krijuar perceptimi se në vendimet e Aleancës për Shqiptarët ka gjithmonë një palë tjetër që vendos! Jo! Vendimi për të dalë nga Qeveria ishte vendim unanim i organeve partiake, të cilat janë sovrane dhe të pavarura.”, - është shprehur kryetari i ASh-së, Arben Taravari. 

 

Ndërkohë nga VLEN-i thonë se janë duke menduar për pasardhësin e Taravarit.

 

“Kemi komunikim intensiv me grupe të ndryshme politike, me subjekte. T’i përfundojmë këto bisedime dhe varësisht nga kjo, do të shohim se kush do të jetë ministër i Shëndetësisë, por edhe për pozitat tjera.”, - theksoi zëvendëskryeministri i parë, Izet Mexhiti. 

 

Sipas deklarimeve të Mexhitit, hisja e Taravarit në Qeveri mbetet brenda VLEN-it. Por, mbetet i paqartë pozicionimi i zëvendëskryeministrit për Qeverisje të Mirë, Arben Fetai, i cili ende nuk është prononcuar edhe përkundër mungesës së tij në takimet partiake të Taravarit.