Partneriteti strategjik RMV-MB pritet të sjellë investime në vlerë prej 6 miliardë eurosh

 

“Pse marrëveshja për partneritet strategjik me Mbretërinë e Bashkuar është e rëndësishme për qytetarët e Maqedonisë? Do të jetë baza dhe themeli i një cikli investues që do të ketë kornizë të plotë në vlerë të 5 miliardë funtave, respektivisht 6 miliardë eurove. Një pjesë e këtyre mjeteve do të shfrytëzohen për investime në infrastrukturë, ndërtimin e rrugës hekurudhore kargo, moderne dhe të shpejtë nga Tabanoci deri në Gjevgjeli. Do të ketë investime në shëndetësi dhe spitale të reja. Përfundimi i projektit për spitalin klinik në Shtip bashkë me ndërtesën e Fakultetit të ri të Mjekësisë, konviktit studentor me kapacitet prej 200 shtretërve. Ndërtimi i spitalit në Kërçovë bashkë me Shtëpinë e Shëndetit. Rikonstruimi spitalit klinik në Tetovë e kështu me radhë.”, tha kryeministri Hristijan Mickoski.

 

Por si, kur, në çfarë mënyre dhe kushte do të arrijnë 6 miliardë euro në vendin tonë, deri në këto momente ende nuk dihet. Mickoski thotë se të dyja qeveritë po punojnë në përmbylljen e detajeve për shfrytëzimin e këtyre mjeteve për investime. Mickoski dhe ambasadori Llosën vlerësuan se kjo marrëveshje është shtylla e dytë kyçe e pozicionimit ndërkombëtarë të vendit tonë, pas partneritetit strategjik që ka vendi me ShBA-të dhe sipas tyre, është një konfirmim shtesë, për stabilitet, siguri dhe të ardhme e sigurt eurovipane. Llosën hedh poshtë spekulimet se kjo marrëveshje detyron pranimin e migrantëve tek ne. 

 

“Jam i kënaqur që vendi juaj u dakordua për këtë bashkëpunim. Ky bashkëpunim ka të bëjë me bashkëpunimin policor midis agjencive, duke u ballafaquar me grupet kriminale, shkëmbim më të mirë me informacione zbuluese, dhe ne këtë e bëjmë edhe me disa vende tjera evropiane. Nuk ka të bëjë me pranimin e migrantëve nga Britania. Ky është një partneritet i gjerë, ka shumë spekulime në mediat britanike. Kjo marrëveshje parashikon bashkëpunim në luftimin e grupeve të emigrantëve këtu dhe në rajon, bashkëpunim midis policisë, ndarjen e informacionit konfidencial. Thelbi i marrëveshjes është ekonomia.”, ambasador i Britanisë në RMV, Methju Llosën.

 

Kjo marrëveshje u negociua për disa muaj radhazi mes ekipeve nga të dyja vendet, u tha me këtë rast.  Marrëveshja për partneritet strategjik midis Britanisë së Madhe dhe Maqedonisë së Veriut u arrit të premten në Samitin e Tiranës mes Mickoskit dhe kryeministrit britanik Starmer.