Dita botërore e sklerozës multiplekse, pacientët kërkojnë kushte më të mira për jetë

Në ditën botërore të  sklerozës multiplekse  u shënuan aktivitete të ndryshme. Pacientët që vuajnë nga kjo sëmundje kërkojnë qasje në diagnostikim dhe trajtim pa kufizime.

Kërkojnë po ashtu nga Fondi Shëndetësor futjen e ilaçeve simptomatike në listën pozitive.

Njëherit  apelojnë edhe institucionet kompetente, që të mundësojnë programe pilot për trajtimin e sklerozës multiplekse në institucione shëndetësore, si në spitalin  "8 Shtatori" në  Shkup, Spitalin Klinik në Shtip dhe  në institucione të tjera rajonale, ku ka kushte, staf dhe ekspertizë.

“Kërkojmë qasje dhe të lidhemi me Fondin Shëndetësor, sepse ata janë kryesorët, që duhet të na dalin në ndihmë. Presim që kjo të ndodhë më shpejt, sepse ilaçet simptomatike ende nuk janë vendosur në listën pozitive.”, - tha një paciente.

Nga Fondi Shëndetësor thonë se këtë vit e  kanë rritur buxhetin në  350 milionë denarë.

“Rreth 700  pacientë që janë me terapi, 250 prej tyre janë me terapi biologjike, ndërsa 450 të tjerë janë me tjetër lloj të terapisë. Ne kemi siguruar rritje të buxhetit me 250 milionë denarë në vitin 2024, ndërsa në vitin 2025 në 350 milionë denarë. Me këtë kemi mundësuar optimizmin e pacientëve që vuajnë nga terapia biologjike.”, - deklaroi drejtori i FSSh-së, Sasho Klekovski.

“Sa i përket harxhimeve të këtyre pacientëve, më shumë se një e treta prej tyre harxhojnë më pak se 500 denarë për udhëtim dhe ushqim. 27  për qind harxhojnë nga 1 mijë deri në 3 mijë denarë, 18 për qind harxhojnë mbi 3 mijë denarë, që për pacientët kronikë është shumë.”, - theksoi kryetarja e Shoqatës për Sklerozë Multiplekse, Ana Karajanova.

Personat  nga  Shoqata “Mobiliteti Maqedoni”, marshuan për të rritur ndërgjegjësimin rreth nevojave specifike të këtyre pacientëve për një jetë më cilësore dhe përfshirje sociale të këtyre personave. (Vlora Latifi – Topojani, TVM2)