Plani operativ për punësimin e të rinjëve, shpall dy thirrje publike për vetëpunësim

 

“Masa e parë është e dedikuar për personat mbi 29 vjeç, dhe parashikon mbështetje financiare prej 430 mijë e 500 denarë për themelimin e një biznesi të ri. Ndërsa masa e dytë është ndërtuar për të rinjtë deri në moshën 29 vjeç, të cilët do të kenë mundësi të përfitojnë mbështetje financiare deri më 615 mijë denarë për krijimin e biznesit të tyre. Kategoritë të cilët mund të aplikojnë janë personat e pa-punë të regjistruar në Agjencionin e Punësimit.”, tha ministri i ekonomisë, Besar Durmishi.

 

Ndërsa drejtori i Agjencis për Punësim tregoi se aplikimi do të kryhet në 30 Qendrat e punësimit.

 

“Procesi i aplikimit veç më ka filluar, dhe po kryhet në 30 qendrat e punësimit, dhe është planifikuar të zgjasë nga sot deri më 20 Qershor të këtij viti. Programi gjithashtu nxitë krijimin dhe shpërndarjen e barabartë të subjekteve ekonomike në vend në të gjitha 8 rajonet planore të shtetit. Mbështetja e sipërmarrësve të suksesshëm në krijimin e ndërmarrjeve mikro dhe të vogla do të nxisë gjenerimin e vendeve të reja të punës. Ndërsa procesi i përzgjedhjes do të realizohet në disa faza dhe synon të mbështes idetë dhe planet më të mira të biznesit që qojnë në rezultate të qëndrueshme.”, tha drejtori i agjencisë për punësim të RMV, Selatin Beluli.

 

Të dyja masat përfshinë trajnime për sipërmarrje, përgatitje të planit të biznesit si dhe mentorim për një periudhë 6 mujore. Ideja sipas Ministrisë së Ekonomisë është stimulimi i sa më shumë të rinjve, dhe kjo nuk do të jetë vetëm ndihma financiare, por investim në potencialin e të rinjëve. Në këto masa përjashtohen veprimtaritë si lojërat e fatit, veprimtaria e taksive, veprimtaria bujqësore, veprimtari të sigurimit.