Kurti: Opozita nuk dëshiron që Kosova të ketë Kuvend

 

“Më lejoni që deputetët opozitarë të cilët nuk po duan që Kosova të ketë Kuvend, pra që ata të kenë shtëpi, t’i quaj deputetë nomadikë, sepse nomadët janë ata të cilët nuk dëshirojnë të kenë shtëpi.”, - deklaroi kryeministri i Kosovës, Albin Kurti.

 

 

Por, kështu nuk mendojnë deputetët opozitarë, sipas të cilëve Kosovën po e mban peng Albin Kurti dhe Lëvizja Vetëvendosje.

 

“Kosova është marr peng nga kokëfortësia, kryeneçësia, papërgjegjësia e Albin Kurtit dhe Lëvizjes Vetëvendosje. Nuk ka fije logjike që institucionet e Republikës së Kosovës të mos konstituohen.”, - theksoi Vlora Çitaku nga PDK.

 

 

Moskonstituimi i institucioneve mund të rrisë shkallën e pasigurisë në Kosovë, ngrit shqetësimin Fatmir Limaj nga Nisma. 

 

“Nëse Kosova vazhdon të mbetet kështu si është, do të rritet shkalla e pasigurisë në vend për Kosovën, kështu që jam i shqetësuar shumë edhe për situatën e sigurisë në vend. Dhe shpresoj që edhe kolegët tjerë e kuptojnë dhe ndajnë informatat e mia se duhet të veprojmë shpejtë, sepse situata e sigurisë mund të komplikohet.”, - u shpreh Fatmir Limaj nga Nisma.

 

Fati i konstituimit të Kuvendit të Kosovës është në duart e Zotit dhe Gjykatës Kushtetuese, thotë deputeti, Nait Hasani.

 

“Në dorë të Zotit dhe Gjykatës Kushtetuese është.”, - u shpreh Nait Hasani nga PDK.                         

                                                     

Në pritje të dakordimit mes partive politike për konstituimin e Kuvendit, kryesuesi i seancës vazhdimin e 35-të të saj e ka caktuar më 21 qershor.