Rasti "Onkologjia", Apeli vendosi në paraburgim efektiv dy ish-drejtorët

 

“Qëndrimi i Prokurorisë së Lartë Publike është se në këtë fazë të procedurës, duke i pasur parasysh të gjitha rrethanat që kanë lidhshmëri me veprat penale që i ngarkohen të dyshuarit, masa e paraburgimit paraqet garanci të mjaftueshme për sigurimin e pranisë së të dyshuarit dhe realizmin me sukses të procedurës penale. Po, i dyshuari ka bashkëpunuar, ka pasur masa dhe i ka respektuar ato, megjithatë ajo ka qenë kohë më parë kur Prokuroria akoma nuk e ka mbledhur atë sasi të provave, të cilat bazat fillestare të dyshimit do t’i ngritnin në nivel më të lartë, në atë shkallë që janë tani.”, - deklaroi prokurorja, Fatime Fetai.

 

Ndërkohë, të dyshuarit kërkuan që të mbrohen në liri. Nino Vasevi, para se gjykata të sillte vendimin, tha se ai i ka respektuar të gjitha procedurat, ka bashkëpunuar me të gjitha institucionet, ka dhënë deklarata dhe nuk ka tentuar të arratiset. Ndërkohë Nehat Nuhi, para gjykatës si rrethana i ka nënvizuar angazhimet e tij në punë, se është prind i tre fëmijëve të mitur dhe se e ka nënën e sëmurë. Tha se është i pafajshëm dhe për ta dëshmuar këtë do të luftojë deri në fund. Në rastin “Onkologjia”, Prokuroria Themelore ka ngritur dy aktakuza kundër dy ish-drejtorëve dhe tre mjekëve onkologë. Nino Vasevi është i akuzuar për “keqpërdorim të pozitës zyrtare”, “mashtrim në detyrë” dhe “përvetësim në detyrë”, me ç’rast, sipas Prokurorisë, buxheti i shtetit është dëmtuar për mbi 2.2 miliardë denarë.