Seanca pyetje deputetësh, FE kundër propozim-ligjit për përfaqësim adekuat

 

“Vallë a mos tentohet që t’i vendoset një mburojë e hekurt këtij ligji që kur të vijë në Parlament, ne si deputetë të mos kemi mundësi që të intervenojmë me arsyetimin se ka thënë Komisioni i Venedikut, e ka dhënë mendimin e tij, është faktori ndërkombëtar dhe ne nuk do të mund ta ndryshojmë, të ndërhyjmë përmes amendamenteve.”, - deklaroi deputeti i Frontit Evropian, Elmi Aziri. 

 

Ministri i Administratës, Goran Minçev, me kundërpërgjigje se deputetët do ta thonë fjalën e fundit.

 

“Të mos keni dilema se dikush po tenton ndër tavolinë të kalojë diçka. Po kush do ta miratojë ligjin? Natyrisht deputetët. Këtë procedurë nuk mund askush ta anashkalojë.”, - theksoi ministri për Administratë, Goran Minçev.

 

 

Opozita hapi debat për përpjekjet bullgare për rimodelimin e identitetit dhe gjuhës maqedonase pranë Parlamentit Evropian. Socialdemokratët kërkuan nga kryeministri Mickoski koordinim në nivel parlamentar, që një amendament i tillë bullgar të bllokohet.

 

“Në Parlamentin Evropian ekziston rreziku serioz që të kalojë raport në të cilin gjuha në mënyrë plotësuese po emërohet. A nuk na duhet neve një unifikim për këtë çështje, pasi një shtesë e tillë shkon në kundërshtim me konkluzionet që ky Parlament i votoi, që askush të mos negociojë për gjuhën, kulturën dhe historinë?!”, - u shpreh deputeti i LSDM-së, Venko Filipçe.

 

 

Për kryeministrin, uniteti është i domosdoshëm, por dëmi daton që nga pranimi i propozimit francez.

 

“Thelbi është të krijojmë toponim të ri, gjuhë moderne maqedonase të disa maqedonasve modern. Ky është thelbi i propozimit francez. Mua më vjen keq që këtë nuk e patë, edhe pse ne e paralajmëruam. Ne punuam dhe besoj se edhe ju do të punoni në këto dy javë deri në seancën plenare.”, - deklaroi kryeministri, Hristijan Mickoski.

 

Sipas kryeministrit, përpjekjet e vendit për t’u bërë pjesë e familjes evropiane nuk do të ndalen, por me një gjuhë dhe identitet të garantuar maqedonas.