Izraeli mbyll kalimet e ndihmave në Gazë, vazhdojnë vrasjet gjatë përpjekjes për ushqim

 

"Ata vranë një familje të tërë, babain, nënën dhe vëllezërit, vetëm dy vajza mbijetuan. Njëra prej tyre është një vajzë e vogël, një vjeç e dy muajsh dhe tjetra është pesë vjeçe.", - tha një banor i Gazës.

 

“Për shkak të urisë dhe mungesës së ushqimit, fëmijët e mi nuk kanë asgjë për të ngrënë. Nuk kam ngrënë miell për gati dy muaj. Duam vetëm të hamë dhe të mbijetojmë, por edhe këtu na vrasin duke marr ushqim.", - tha një banor i Khan Junisit, Imad al-Atar.

 

“I shpenzuam të gjitha parat, nuk kemi ngrënë asgjë me miell për gati një vit. Fëmijët e mi u plagosën nga sulmet në pikat e ndihmave, por janë gjallë, falënderoj Zotin. Sot erdha unë të marr ushqim.”, - u shpreh një banore e Gazës.

 

Presidenti i Këshillit Evropian, Antonio Kosta, e përshkroi krizën humanitare në Gazë si "katastrofike" dhe shprehu keqardhje për situatën e të drejtave të njeriut atje.

 

"Situata humanitare në Gazë është plotësisht e papranueshme dhe kjo është arsyeja se përse përfaqësuesi i lartë kërkon një vlerësim në lidhje me nenin dy të Marrëveshjes së Asociimit - partneriteti BE-Izrael. Raporti është shumë i qartë. Ekziston një shkelje sistematike nga Izraeli, e të drejtave të njeriut në Gazë. Ne morëm shënim këtë raport dhe i kërkuam përfaqësuesit në Këshillin e Ministrisë së Punëve të Jashtme të marrë vendime dhe të miratojë hapin tjetër.", - deklaroi presidenti i Këshillit Evropian, Antonio Kosta.

 

ShBA-ja miratoi mbështetjen e parë të drejtpërdrejtë financiare për organizatën private të ndihmave humanitare, e cila ofron ndihmë humanitare për palestinezët në Gazë.

 

“Ne kemi miratuar 30 milionë dollarë fonde për Fondacionin Humanitar të Gazës dhe u bëjmë thirrje vendeve të tjera që të mbështesin gjithashtu fondacionin dhe punën vendimtare.”, - theksoi zëvendëszëdhënësi kryesor në Departamentin e Shtetit, Tomi Pigot.

 

Ndërkohë veprimtaria e kësaj organizate në Rripin e Gazës është objekt diskutimesh dhe debatesh. Fondacioni Humanitar i Gazës mbështetet nga ShBA-ja dhe Izraeli. Në maj të këtij viti, Fondacioni filloi punën në Rripin e Gazës, ku ka hapur katër qendra shpërndarjeje ndihmash në jug dhe në qendër të territoreve palestineze dhe në këto pika janë vrarë qindra civilë, duke u përpjekur të marrin ushqim.