Shpërthimi i zjarreve, VMRO: Aksion i organizuar me prapavijë politike

 

“A kishin për qëllim të shkaktojnë kaos në Shkup, dhe për këtë menjëherë pas shpërthimit të zjarreve u kyç LSDM dhe njerëz të afërt të partisë me komunikata dhe komente? A u nis opozita në një aksion të organizuar për të shfrytëzuar zjarret për narrative politik?”, deklaroi Brane Petrushevski nga VMRO-DPMNE.

 

 

Opozita shfajëson veten nga pretendimet e pushtetit. BDI paralajmëron padi ndaj akuzave të bëra duke i cilësuar si shpifje dhe logjikë diskriminuese.

 

“Këtë herë, vijat e kuqe janë kaluar edhe atë me instrumentalizim të policisë, mediave si dhe kanaleve diplomatike në rrjetën e shpifjeve, për të legjitimuar gënjeshtra të fabrikimit politik. Kjo është e rrezikshme për sigurinë dhe reputacionin ndërkombëtar të shtetit. BDI do të përballet institucionalisht dhe penalisht me çdo shpifës, me deklaratat e tyre publike që mendon se mund të shpëtojë dështimet e qeverisë përmes fajësimit të shqiptarëve.”, thuhet në reagimin e BDI-së.

 

 

Edhe nga LSDM thonë se qeveria për të fshehur paaftësinë e tyre fajëson ata me absurditete.

 

“Më të përfshira nga zjarret janë komunat e drejtuara nga LSDM, dhe çfarë të themi tani se zjarret janë vënë nga njerëz të pushtetit!! VMRO – DPMNE nuk është e vetëdijshme se kanë hyrë në humbje të dyfishtë, gjegjësisht treguan paaftësi të dyfishtë, jo vetëm në menaxhimin me zjarret por edhe me shërbimet e sigurisë, pasiqë nuk kanë marrë në kohë informacione se bëhet fjalë për zjarre të qëllimshme.”, u shpreh Bogdanka Kuzeska nga LSDM.

 

Socialdemokratët ftojnë VMRO- DPMNE-në që të mbështesë amendamentin e tyre të dorëzuar në kuvend për përmirësimin e sistemit për përballje me zjarret dhe të ndërpresë akuzat.