Kosovë, nesër përpjekja e 50 për konstituim të Kuvendit

 

Lëvizja Vetëvendosje, si partia e parë nga zgjedhjet, ka të drejtën të propozojë kandidatin për këtë post, mirëpo kandidatja e tyre, Albulena Haxhiu, nuk ka arritur të sigurojë mbështetjen e nevojshme në votimet e deritanishme. Gjykata Kushtetuese e Kosovës ka nxjerrë më 26 qershor një vendim që i obligon deputetët ta konstituojnë Kuvendin deri më 26 korrik. Megjithatë, në vendim nuk është saktësuar se çfarë pasojash do të ketë në rast se ky afat nuk respektohet, duke e lënë të hapur mundësinë për krizë të mëtejshme institucionale. 

 

Ndërkohë, përpjekjet për një marrëveshje politike ndërmjet liderëve të partive kryesore nuk kanë dhënë rezultat. Takimi i fundit ndërmjet Albin Kurtit, lider i Vetëvendosjes dhe kryeministër në detyrë, dhe Fatmir Limajt nga Nisma Socialdemokrate, përfundoi pa ndonjë marrëveshje, gjë që bën të mundur përsëritjen e të njëjtës situatë edhe në seancën e së hënës. 

 

Kosova, pesë muaj pas zgjedhjeve, vazhdon të mbetet pa institucione të reja dhe pa një Kuvend funksional, ndërsa mungesa e konsensusit politik po zgjat krizën dhe paqartësinë institucionale në vend.