Çarshia e Shkupit, edicioni i 20-të i “Mbrëmjeve Folklorike të Çarshisë”

 

Ky festival e shndërroi Sheshin “Skënderbeu” në zemrën e kulturës, folklorit dhe miqësisë ndërkombëtare! Në këtë manifestim morën pjesë ansamble nga 9 shtete, edhe atë dy nga Gjeorgjia, dy nga Turqia,  si dhe ansamble nga Ukraina, Mali i Zi, Rumania, Bullgaria dhe Polonia. Për herë të parë festivali zgjati tre net.

 

Nga nata e parë deri te finalja madhështore, çdo performancë ishte një tregim më vete, një pasqyrim i shpirtit të popujve përmes veshjeve tradicionale, muzikës, vallëzimeve dhe dashurisë për trashëgiminë. Në natën finale, pas performancave të mrekullueshme, juria dhe publiku shpallën fituesit.

 

Në juri krahas përfaqësuesve nga Maqedonia e Veriut, kishte mysafirë edhe nga Kosova dhe Malta, të cilët vlerësuan performancat e secilit ansambël. Vendi i parë iu nda ansamblit nga qyteti Bursa i Turqisë, vendi i dytë shkoi për ansamblin Oho Nona nga Gjeorgjia, vendi i tretë shkoi për ansamblin nga Bullgaria. Të gjithë pjesëmarrësve iu nda mirënjohje për pjesëmarrjen, kontributin dhe promovimin e trashëgimisë kulturore. Ndërsa fituesit u shpallën nga drejtori i AKV-së, Vebi Amza. 

 

Organizatorët nga Ansambli “Ibe Palikuqi” premtuan se vitin tjetër për organizimin e festivalit do të jenë edhe më të përkushtuar.