Aliu në Tetovë: 155 punësimet në Spitalin e Tetovës, punë e kryer

 

“Ministria e Shëndetësisë sot thotë se 155 persona i kanë kaluar të gjitha filtrat, tani ka mbetur procesi i testimit të tyre. Të mbyllet një proces dhe të mundohet të zhbëhet lajm i rrejshëm, është jonjerëzore. Këta 155, që janë pas meje, të mund t’i abuzosh 10 vite dhe të vraposh ende t’i abuzosh kur ato e kanë të zgjedhur problemin, çfarë mund të them të paktën, është jonjerëzore. Këta persona 10 vite kanë qenë të shantazhuar, nuk e kanë zgjidhur problemin dhe sot kur vijmë këtu para juve e themi se problemi është zgjidhur. Këta persona me vite kanë punuar pa rrogë vetëm të jenë pjesë e institucionit që t’u ndihmojnë qytetarëve të Tetovës dhe të thuash se nuk është zgjidhur problemi, jo që është turp, por është jonjerëzore. Unë jam i sigurt që të gjithë këta kolegë që janë pas meje, me gjithë atë punë që e kanë pasur, me gjithë atë stres që e kanë kaluar, jo që do ta kalojnë testin, por do të shkojnë dhe do të dalin të lumtur për pyetjet që do të japin.”, - theksoi ministri i Shëndetësisë, Azir Aliu.

 

 

Të punësuarit thonë se ky hap i inkurajon edhe më shumë për punë, duke theksuar se ky është një hap i ri, që  me vite e kanë pritur.

 

“Ky hap i rëndësishëm institucional përbën jo vetëm një njohje të drejtë të angazhimit tonë, por edhe një fillim të ri drejt sigurimit të stabilitetit dhe të drejtave tona punëtore, me kalimin nga kontratat në vepër në kontrata të përhershme. Ky rezultat na inkurajon që të vazhdojmë me punën me përkushtim edhe më të madh, duke e parë këtë zhvillim si një hap të rëndësishëm drejt  ndërtimit të një sistemi shëndetësor më të drejtë dhe më të qëndrueshëm për  të gjithë.”, - u shpreh Fjolla Alija. 

 

Ministri Aliu, njëherësh paralajmëroi se shumë shpejt do të dalin me detaje për investimet në Spitalit e Tetovës, ku në fazën e parë pritet të investohet 40 milionë euro dhe në fazën e dytën 50 milionë euro.