Vendi po përballet me temperatura tropikale, IShP: Kujdes të shtuar për të sëmurët kronikë

 

“Më shumë kujdes duhet të kenë grupet  e rrezikuara, sidomos të sëmurët kronikë, pacientët me sëmundje kardiovaskulare, të sëmurët nga mushkëritë dhe ata neurologjikë. Pacientët duhet ta marrin terapinë në kohë, të përmbahen në këshillat dhe rekomandimet e mjekëve, si dhe për çdo ndryshim të gjendjes shëndetësore të paraqiten tek mjeku amë.”, - deklaroi Maria Andonovska nga IShP.

 

 

Ekipet e Kryqit të Kuq janë në terren dhe u japin ndihmë qytetarëve sipas nevojave. Ata kanë intervenuar në 13 raste, 4 ekipe me 12 anëtarë.  

 

“Kryqi i Kuq i qytetit të Shkupit nga dita e hënë me 5 ekipe kanë patrulluar në stacionet e autobusëve më të frekuentuara. Bëhet fjalë për 15 vullnetarë dhe pjesë të ekipeve profesionale që ndihmojnë qytetarët. Ekipet e Kryqit të Kuq janë të pranishëm nga ora 11:00 deri në orën 16:00 dhe janë kryer 13 intervenime.”, - theksoi Argjent Cilafi nga Kryqi i Kuq. 

 

Në këto temperatura të larta një pjesë e qytetarë të kryeqendrës, që jetojnë në banesa në katet e larta, përballen me mungesë të ujit. 

 

“Rrjedh pak ujë, por nuk është i mjaftueshëm. Për herë të parë ndodh kjo.”, - tha një qytetar.

 

“Para pesë ditëve, 1 ditë e gjysmë nuk ka pasur fare ujë, ndërsa ditën e djeshme thuajse tërë ditën nuk ka pasur ujë.”, - tha një qytetar tjetër.

 

 

Nga ndërmarrja “Ujësjellësi dhe Kanalizimi“ apelojnë që qytetarët të përdorin ujin në mënyrë racionale. 

 

“Të mos përdoret uji për ujitjen e gjelbërimit, për mbushjen e baseneve,për larjen e veturave, të rrugëve, për kyçjen jolegale nga rrjeti ynë, sepse të gjitha këto detektohen si anomali që çojnë në zvogëlimin e presionit të ujit. Konsumi është përsëri rreth treqind e pesëdhjetë mijë metra kub ujë në ditë, që është afërsisht gjashtëqind e pesëdhjetë deri në shtatëqind litra për kokë qytetari, dhe më lejoni të përmend se normat evropiane janë rreth dyqind litra.”, - u shpreh Zoran Nedevski nga NP “Ujësjellësi dhe Kanalizimi”.

 

Nga Enti Hidrometeorologjik njoftojnë se edhe gjatë ditëve në vijim moti do të jetë nën valën e të nxehtit tropikal që kalojnë mbi 40 gradë Celsius.