Shënohet dita më e nxehtë e vitit, Mjekët: Të shkurtohet orari i punës për të gjithë

 

Qeveria ka miratuar vendim që obligon punëdhënësit nga data 23 deri më 26 korrik që t’i lirojnë nga puna kategoritë e rrezikuara, gratë shtatzëna dhe personat mbi 60 vjeç. Edhe Ministria e Shëndetësisë u bëri apel qytetarëve që t’u përmbahen rekomandimeve ekzistuese për vetëmbrojtje, të cilat përfshijnë qëndrimin në hapësira të freskëta, veçanërisht nga ora 11:00 deri në orën 17:00, pirjen e mjaftueshme të lëngjeve, shmangien e alkoolit dhe pijeve me sheqer, veshjen e rrobave të lehta dhe me ngjyrë të hapur, përdorimin e mbrojtësve të kokës dhe syve, si dhe shmangien e aktivitetit fizik gjatë orëve më të nxehta.

 

Mjekët thonë se në kushte kur temperaturat janë shumë të larta, rekomandimet e Qeverisë nuk janë të mjaftueshme. Sipas tyre, duhet të merren masa të detyrueshme. 

 

“Rekomandim deri tek institucionet, nëse munden të sjellin vendim për shkurtimin e orarit të punës për të gjithë shoqërinë, sepse me të vërtetë këto temperatura të larta mbi 45 gradë Celsius janë ferr i vërtetë për qytetarët.”, - theksoi një mjeke. 

 

Drejtoria për Punë Hidrometeorologjike ka aktivizuar tashmë alarmin e kuq për motin. Ata njoftojnë se vala e të nxehtit tropikal do të vazhdojë deri ditën e shtunë, ndërsa ditën e diel pritet të ulen temperaturat dhe të freskohet moti.