BE sërish me porosi për Kosovën dhe Serbinë, rruga evropiane kalon nëpërmjet dialogut

Ky reagim i Brukselit vjen pas deklaratës së presidentit francez Emmanuel Macron, i cili në një bisedë me homologun e tij serb, Aleksandar Vuçiq, ka theksuar rëndësinë e bisedimeve Kosovë–Serbi dhe zbatimit të marrëveshjeve të arritura. 

 

"BE-ja pret që Serbia dhe Kosova të përmbushin shpejt angazhimet e tyre ndaj Dialogut, duke pasur parasysh lidhjen e drejtpërdrejtë midis normalizimit gjithëpërfshirës të marrëdhënieve dhe perspektivave konkrete për aspiratat e tyre drejt BE-së. Rruga drejt Bashkimit Evropian për të dyja palët kalon përmes Dialogut të lehtësuar nga BE-ja”, kanë nënvizua nga zyra e shtypit e Komisionit Evropian. 

 

Njëherit bëhet e ditur se pas takimit të fundit të kryenegociatorëve në qershor, BE-ja mbetet e gatshme të organizojë raundin e ardhshëm të dialogut sapo palët të sinjalizojnë gatishmërinë për takim, qoftë në nivel teknik apo politik. 

 

Sa u përket raporteve Kosovë-Serbi edhe Presidenti i Shteteve të Bashkuara të Amerikës Donald Trump, ka folur sërish për angazhimin e tij në parandalimin e konfliktit. 

 

"Kosova, e dini për këtë. Serbia, ajo do të shpërthente”, ka thënë Trump në një intervistë për gazetarin australian Mario Nawfal, duke theksuar se ka arritur të ndalojë shpërthimin e mundshëm të luftës mes Kosovës dhe Serbisë, ashtu si edhe disa konflikte tjera në botë. (Gyltene Sinani, TVM2)