Thirrjet antishqiptare në Kumanovë, Mickoski: Nuk i vuna re por rasti do të hetohet

 

“Për të qenë i sinqertë, përderisa isha aty, as që i vura re këto brohoritje, sepse bëhej fjalë për një grup të vogël. Por, shfrytëzoj rastin që të përfshihem në dënimin e nacionalizmit dhe ksenofobisë, së pari ndaj asaj që ndodhi në ndeshjen e basketbollit mes Maqedonisë dhe Rumanisë dhe t’u bëj thirrje të gjitha grupeve tifoze që të përkrahin ekipin e tyre në mënyrë sportive. E tërë kjo do të jetë lëndë hetimore dhe sanksionuese, pa marrë parasysh se nga cila anë vjen”, u shpreh kryeministri Hristijan Mickoski.

 

 

 

“BDI e ka bërë të qartë: nuk do të lejojmë që shqiptarët dhe çdokush nga qytetarët të bëhet shënjestër e thirrjeve fashiste në vendin ku janë bashkëthemelues të shtetit. Për këtë arsye, ne kërkojmë përgjegjësi politike konkrete – dorëheqje të menjëhershme të Astrit Isenit, zëvendësministër i punëve të brendshme dhe dorëheqje të Safije- Sadiku Hiseni, zëvendësministre për sport, për mosveprimin, mosreagimin, paaftësinë dhe heshtjen përballë një sulmit të rëndë ndaj dinjitetit të qytetarëve shqiptarë dhe bashkëjetesës ndëretnike”, theksoi Emir Sulejmani nga BDI.

 

 

 

“Ngjarja në Kumanovë ishte një incident i rëndë, i cili shqetësoi të gjithë opinionin. VLEN e dënoi ashpër atë. Megjithatë, ndryshe nga koha kur BDI ishte pjesë e qeverisë dhe raste të tilla mbuloheshin dhe injoroheshin, sot shteti reagon shpejt, me vendosmëri dhe në mënyrë transparente”, u shpreh Driton Sulejmani nga koalicioni VLEN.

 

Për këto thirrjet antishqiptare Prokuroria Themelore Publike në Kumanovë, ka hapur procedurë hetimore dhe ka lëshuar udhëzime për SPB Kumanovë për të hetuar elementet e një vepre penale lidhur me thirrje me përmbajtje të gjuhës së urrejtjes, tani për tani, nga persona të panjohur.

 

Sipas njoftimit të Prokurorisë, është dhënë gjithashtu urdhër për sigurimin e inçizimeve nga kamerat e sigurisë, me qëllim, identifikimin e autorëve të kësaj ngjarjeje.