Rusia godet Kievin me raketa dhe dron, ka viktima dhe dhjetëra të plagosur, dëmtohet godina e delegacionit të BE-së

 

“Dëgjova një shpërthim të fortë në shtëpinë ngjitur, dera më ra mbi kokë. I gjithë apartamenti u shkatërrua, makinat u dëmtuan, menjëherë vrapuam jashtë dhe u strehuam.”, - tha një banor i Kievit, Vitalij Sançenko.

 

“Dëgjova një shpërthim në prapavijë, pastaj një tjetër, dritaret tashmë ishin thyer. Doja të ikja, por vetëm pas disa sekondash ndodhi një shpërthim i ri. Pastaj gjithçka përfundoi.”, - tha një banore e Kievit, Sofia Akilova.

 

Në sulm u dëmtua edhe godina e delegacionit të BE-së. Brukseli e dënoi këtë akt.

 

“Jam i tmerruar nga edhe një sulm tjetër i natës, vdekjeprurës, me raketa ndaj Ukrainës. Mendimet e mia janë me viktimat ukrainase dhe me personelin e delegacionit të BE-së në Ukrainë, ndërtesa e të cilit u dëmtua nga ky sulm i qëllimshëm rus. Agresioni rus vetëm sa e forcon vendosmërinë tonë të qëndrojmë përkrah Ukrainës dhe popullit të saj.”, shkroi presidenti i Këshillit Evropian, Antonio Kosta.

 

 

Edhe Zelenski tha se ky sulm i tregoi botës përgjigjen e Rusisë ndaj përpjekjeve diplomatike të presidentit amerikan Tramp për t’i dhënë fund luftës. Ai vazhdon të kërkojë më shumë presion mbi Putinin.

 

“Rusët nuk do të përmbushin atë që i premtuan ShBA-së dhe të tjerëve në botë që insistojnë për t’i dhënë fund vrasjeve dhe për diplomaci të vërtetë. Duhet të ushtrojmë presion. Duhet ta detyrojmë Rusinë të ndërmarrë hapat e duhur, të përfundojë luftën që e nisi.”, - theksoi presidenti i Ukrainës, Volodimir Zelenski.

 

 

Zelenski gjithashtu konfirmoi takimin e nesërm në Nju Jork mes delegacionit amerikan dhe atij ukrainas për garancitë e sigurisë ndaj Kievit. Kremlini shprehet për paqe, por kundërshton vendosjen e trupave. Kancelari gjerman Merz paralajmëroi se kapitullimi i Ukrainës do t’i jepte kohë Putinit për një luftë të re.

 

“Kjo luftë duhet të përfundojë. Por, jo me çdo çmim. Ne nuk duam që Ukraina të kapitullonte. Një kapitullim i tillë vetëm do t’i jepte kohë Rusisë, të cilën Putini do ta përdorte për t’u përgatitur për luftën e ardhshme.”, - deklaroi kancelari i Gjermanisë, Fridrih Merz.

 

Evropa po rrit prodhimin e municioneve të artilerisë. Në Gjermaninë veriore është hapur një fabrikë e re ushtarake për forcimin e sigurisë së kontinentit dhe mbështetjen e mbrojtjes së Ukrainës. Që nga fillimi i luftës, industria evropiane e mbrojtjes është kritikuar për ngadalësinë dhe kapacitetet e pamjaftueshme, gjë që e ka vonuar furnizimin me armë dhe municion për Kievin.