Vijonë sulmet mbi Ukrainë, Ukraina hakmerret me dronë

 

“Dëgjuam shpërthimet, papritmas e gjithë shtëpia u mbulua me pluhur dhe tym. Shumë e frikshme”, theksoi banorja e Zaporizhias.

 

Ukraina është hakmarrë me dronë. Rafineritë ruse të naftës në Krasnodar dhe Samara janë goditur, janë raportuar zjarre dhe shpërthime. Presidenti ukrainas Zelenski ka akuzuar Moskën në mediat sociale se po përdor kohën e destinuar për përgatitjen e një takimi në nivel udhëheqësish për të organizuar sulme të reja masive.

 

“E vetmja mënyrë për të rihapur një dritare mundësie për diplomacinë është përmes masave të ashpra kundër të gjithë atyre që financojnë ushtrinë ruse dhe sanksioneve efektive kundër vetë Moskës - sanksione bankare dhe energjetike. Kjo luftë nuk do të ndalet vetëm me deklarata politike; nevojiten hapa realë. Ne presim veprime nga Shtetet e Bashkuara, Evropa dhe e gjithë bota”, u shpreh presidenti i Ukrainës, Volodimir Zelenski.

 

Mes negociatave të vështira për paqe, Zelensky po kërkon një takim të ri me Shtetet e Bashkuara dhe BE-në. Kriza ukrainase është gjithashtu në fokus në një takim joformal të ministrave të jashtëm evropianë në Kopenhagen. Po kërkohet më shumë presion mbi Moskën për t'i dhënë fund luftës.

 

“Ne duhet të ushtrojmë edhe më shumë presion mbi Putinin. Është e qartë se ai thjesht po zvarrit. Ne duhet të diskutojmë se si mund të biem dakord për paketën e 19-të të sanksioneve sa më shpejt të jetë e mundur”, theksoi ministri i punëve të jashtme të Danimarkës, Lars Loke Rasmusen. 

 

“Ne shohim që Rusia nuk dëshiron paqe, megjithëse ka shumë përpjekje diplomatike për të sjellë Zelenskyn dhe Putinin në tryezën e bisedimeve. Ne do të përqendrohemi në çështjen e aseteve të ngrira. Nuk mund ta imagjinojmë fare, nëse ka një armëpushim ose një marrëveshje paqeje, që kjo pronë t'i kthehet Rusisë dhe ajo nuk do të paguajë dëmshpërblime”, u shpreh përfaqësuesja e lartë e BE-së për politikën e jashtme Kaja Kallas.

 

Uashingtoni gjithashtu ka kërcënuar se nëse nuk ka marrëveshje, Moska do të përballet me sanksione. Në një takim urgjent të Këshillit të Sigurimit të OKB-së, ata e paralajmëruan Rusinë të ecë drejt paqes.

 

“Rusia tani duhet të vendosë të ecë drejt paqes. Udhëheqësit e Rusisë dhe Ukrainës duhet të bien dakord të takohen në mënyrë bilaterale. Presidenti Trump ka paralajmëruar për masa të mëtejshme ekonomike nëse Rusia vendos të vazhdojë këtë luftë”, theksoi përfaqësuesi në detyrë i SHBA-së në OKB, Xhon Kelli. 

 

Rusia akuzohet për sulme ndaj qyteteve ukrainase dhe ata po përpiqen të pretendojnë pa prova se objektivat e sulmeve dyshohet se ishin objekte civile”, tha Dmitry Polyansky, zëvendëspërfaqësuesi i parë i përhershëm i Rusisë në OKB.

 

Kremlini përsëriti qëndrimin e tij tashmë të njohur se Rusia nuk e refuzon propozimin që Putini të takohet me Zelenskyn, por se takimi duhet të bazohet në kushte të dakordësuara më parë.