Izraeli intensifikon sulmet në Gazë, 40% e territorit në Gazë është nën kontrollin e IDF-së

 

“Vazhdojmë të godasim infrastrukturën e Hamasit. Aktualisht kontrollojmë 40 për qind të territorit të qytetit të Gazës. Operacioni do të zgjerohet dhe intensifikohet në ditët në vijim. Ky është vetëm fillimi.”, - deklaroi zëdhënësi i Ushtrisë Izraelite, Efi Dafrin. 

 

Nëpërmjet një videoje, Izraeli konfirmoi vrasjen e zëdhënësit të krahut të armatosur të Hamasit. Ndërkohë që burime palestineze raportojnë për dhjetëra të vrarë dhe të plagosur, UNICEF-i paralajmëron se rreziku nga uria po thellohet dhe fëmijët duhet të mbrohen.

 

“Bota po paralajmëron për një katastrofë të mundshme për gati një milion njerëz që ndodhen në qytetin e Gazës, nëse ofensiva ushtarake intensifikohet. Situata është në përshkallëzim. Kequshqyerja dhe uria po i dobësojnë fëmijët, zhvendosja ua ka marrë shtëpitë dhe kujdesin, ndërsa bombardimet po e rrezikojnë çdo lëvizje të tyre.”, - theksoi zëdhënësja e UNICEF-it, Tes Ingram. 

 

Ingram u bëri thirrje autoriteteve izraelite të rishikojnë rregullat e luftës për të mundësuar ndihmën humanitare, por gjithashtu kërkoi nga Hamasi që të lirojë të gjithë pengjet që mbahen tashmë prej 700 ditësh. Familjarët e pengjeve i dërguan një mesazh ish-presidentit Tramp përmes një pankarte “Doni t’i shpëtoni? Shpëtoni ata! Mos flisni!”. ShBA-ja ka vendosur sanksione ndaj disa organizatave civile palestineze, të cilat kërkojnë që situata në Gazë të shpallet si gjenocid. Këto masa erdhën vetëm pak ditë pasi shoqata më e madhe akademike e studiuesve të gjenocidit në botë miratoi një rezolutë ku thuhet se janë përmbushur kriteret ligjore për të konstatuar se Izraeli po kryen gjenocid në Gazë.