Bie qeveria në Francë, vendi në pasiguri politike

 

“Bayrou kërkoi një moment të së vërtetës dhe unë besoj se ai e mori. Por, ajo që tregon rezultati, madje edhe përtej qeverisë së Bayrou, është mashtrimi që Makroni i ka bërë popullit, i cili po del në pah. Kuptoni se vetëm një e treta e Parlamentit i dha besimin kryeministrit. Kjo do të thotë që politika e Makronit, në shërbim të të pasurve dhe në një luftë sociale kundër popullit, mori dy të tretat e votave kundër në Parlament.”, - deklaroi deputetja dhe kryetarja e grupit të majtë radikal, “Franca e pashtruar”, Matilde Panot.

 

Në votimin e mbajtur në Asamblenë Kombëtare, 364 deputetë votuan kundër qeverisë, ndërsa vetëm 194 i dhanë besimin. 

 

"Emanuel Makron duhet të shpërndajë Parlamentin. Kur situata është në ngërç, siç është tani në Asamblenë Kombëtare, nuk ka shumicë. Duhet t’i kërkohet popullit francez të vendosë.", - theksoi deputeti i "Rassemblement National”, Sebastien Chenu.

 

"Ose ka një kryeministër që është i aftë të gjejë një mënyrë për të shmangur mocionin e mosbesimit kur paraqet buxhetin, ose ky kryeministër nuk është i aftë ta bëjë këtë. Dhe në atë rast, do ta rikthejmë në tryezë çështjen e shpërndarjes së Asamblesë, por jo nga dëshira, e as nga kapriçot, thjesht, sepse është mënyra e vetme në realitet, dhe mënyra më e mirë sipas Kushtetutës sonë për të dalë nga një krizë politike që, me kalimin e kohës, mund të shndërrohet në një krizë të regjimit.", - theksoi deputetja në Asamblenë Kombëtare, Marine Le Pen.

 

Rezultati i votimit shënoi një krizë të re për ekonominë e dytë më të madhe në Evropë. Presidenti Makron tani duhet të emërojë kryeministrin e katërt brenda 12 muajsh.  Bayrou është kryeministri i gjashtë nën presidencën e Makronit që prej zgjedhjes së tij në vitin 2017, por i pesti që prej vitit 2022, duke theksuar paqëndrueshmërinë politike. Rrëzimi i tij vjen në një kohë kur Makroni është i angazhuar në përpjekje diplomatike për luftën në Ukrainë.