Inspektimi i listës zgjedhore, Demiri: Nesër në mesnatë do të skadojë afati

 

“Po vijon procesi i shikimit publik në listën zgjedhore, i cili ka filluar më 23 gusht. Deri më tani që po flasim, numri i votuesve të cilët i kanë kontrolluar të dhënat e tyre në Listën Zgjedhore është 5.729 votues. Afati i shikimit publik përfundon nesër, respektivisht më 11 shtator, ora 00:00 në mesnatë. I ftoj qytetarët të cilët janë të interesuar që të kontrollojnë të dhënat e tyre, të cilët dëshirojnë të plotësojnë apo ndryshojnë të dhënat e tyre, ta shfrytëzojnë këtë të drejtë deri nesër.”, - deklaroi nënkryetari i KShZ-së, Abdush Demiri. 

 

Në ndërkohë, deri më 13 shtator do të përfundojë afati për dorëzimin dhe plotësimin e dokumentacionit të nevojshëm për të gjithë kandidatët e mundshëm. Dy ditë më vonë, respektivisht më 15 shtator, KShZ-ja do të bëjë verifikimin e të gjithë kandidatëve për kryetarë të komunave dhe listat për këshilltarë komunalë, të cilët do të garojnë zyrtarisht në zgjedhjet e teta lokale në tetor.

 

“Pjesëmarrësit në zgjedhje listat e tyre i dorëzojnë deri tek komisionet komunale deri në afatin e përcaktuar, respektivisht deri më 13 shtator në mesnatë. Pas këtij afati, KShZ-ja i shqyrton të gjitha listat, ku shikohet a janë dorëzuar të njëjtat në afatin e përcaktuar kohor, e më pas shqyrton kushtet tjera të cilat janë paraparë në Kodin Zgjedhor dhe nëse vërejnë ndonjë mangësi në ndonjë listë u japin afat 48 orë, që të njëjtat mangësi t’i mënjanohen dhe të dorëzohen përsëri në listat e plotësuara dhe më pas KShZ-ja në përputhje me Kodin Zgjedhor do të vërtetojë listat pjesëmarrëse.”, - theksoi nënkryetari i KShZ-së, Abdush Demiri.

 

Në vijim e sipër në KShZ po ashtu është edhe paraqitja për vëzhgimin dhe raportin e zgjedhjeve dhe ekipimin e anëtarëve të komisioneve komunale zgjedhore. Deri më tani janë akredituar 14 vëzhgues të OSBE-ODIHR-it, ku ata po ndjekin punën e KShZ-së dhe të komisioneve komunale zgjedhore. Rrethi i parë i votimit do të mbahet më 19 tetor, ndërsa i dyti më 2 nëntor. Në këto dy rrethe zgjedhore, qytetarët do të zgjedhin 80 kryetarë të komunave dhe po aq këshille komunalë dhe njëherësh do të zgjedhin edhe kryetarin e Qytetit të Shkupit.