Zjarri në Trubarevë, partitë me qëndrime të ndara

 

“Ajo që po ndodh është një turp për një vend dhe një qeveri që po zhytet në kaos për shkak të paaftësisë dhe indiferencës. Mbi 500 mijë banorë të Shkupit dhe zonës përreth janë në rrezik shëndetësor për shkak të tymit toksik. Një katastrofë ekologjike po i ndodh Shkupit, dhe qeveria e paaftë nuk ka as kapacitetin dhe as njohuritë për t'u përballur me situatën.”, u shpreh Bogdanka Kuzeska, zëdhënëse e LSDM-së.

 

Por kryeministri Hristijan Mickovski thotë se posedon informacione se qendra të caktuara po përpiqen të pengojnë punën e qeverisë dhe të mos ketë sukses. 

 

“Zjarrvënie të tilla do të ketë, edhe në periudhën që na vjen, sepse kemi qendra të fuqive të ndryshme brenda vendit, e të cilat nuk dua që kjo Qeveria të ja dalë mbanë. Por ne do të luftojmë, ato do të vazhdojnë të ndezin zjarre, dhe të krijojnë skenare të tilla, ndërsa ne do të vazhdojmë të luftojmë, dhe në fund do të fitojmë.”, u shpreh kryeministri Hristijan Mickovski.

 

Nga ana tjetër BDI kritikoi Ministrin e Mjedisit, Izet Mexhiti, për papërgjegjësi për qytetarët e Shkupit në momentet më kritike.

 

“Ndërsa ajri në Shkup mbante erë helmi, Izet Mexhiti, i cili me sa duket harroi se ishte Ministër i Mjedisit, nuk tha asnjë fjalë. Ai nuk doli publikisht, nuk dha rekomandime, nuk ofroi informacione, nuk bëri asnjë apel. Kur qytetarët kishin frikë për shëndetin e tyre, gjëja më e rëndësishme për të ishte të transmetonte drejtpërdrejt një ngjarje partiake në Çair, sikur të mos ndodhte asgjë.”, thuhet ne komunikatën e BDI-së.

 

 

Nga VMRO-DPMNE thonë se LSDM dhe BDI janë frymëzuesit dhe nxitësit e vërtetë të zjarreve në vend.

 

“Ata janë frymëzuesit dhe nxitësit e vërtetë të zjarreve në Maqedoni. Përgjegjësia për të gjitha fatkeqësitë në vend është e tyre”, thonë nga VMRO-DPMNE.