Tetovë, varroset fëmija 7-vjeçare, Elezi fajëson mjekun amë

 

“Unë kam qenë në vendngjarje dhe në moment kam thirrur komisionin disiplinor për protokoll që të shohim nga ana e Spitalit Klinik të Tetovës se a ka qenë në rregull, a është pranuar si duhet dhe a janë bërë të gjitha ekzaminimet e duhura mjekësore. Edhe sot pata mbledhje bashkë me mjekët që të arrijmë deri tek e vërteta e pacientes. Edhe nga ana e ministrisë jam informuar që kanë përgatitur një komision shëndetësor për reagim sa më të shpejtë. Por, ka qenë tek mjeku amë dhe ka pranuar terapi intravenoze që është e jashtëligjshme. Nuk është e ligjshme, është e kundërligjshme që të jepen terapi në ambulanca private. Apeloj se shumë raste na vijnë në spital me gjendje të rëndë pasi marrin terapi nëpër ambulanca private, pastaj kur përkeqësohet gjendja i sjellin në Spitalin e Tetovës.”, - deklaroi drejtori i Spitalit Klinik të Tetovës, Erzen Elezi.

 

 

Nga ana tjetër, Prokuroria e Tetovës jep urdhër për obduksion të trupit të pajetë të shtatëvjeçares, ndërsa familja sot kanë varrosur fëmijën në fshatin Çellopek, komuna e Bervenicës.

 

“Prokurori Publik i Prokurorisë së Tetovës, menjëherë pas rastit ishte njoftuar se ka incident me dëmtim të pronës së spitalit dhe pasi kishte kuptuar shkakun e incidentit, prokurori menjëherë që mbrëmë, fillimisht gojarisht, pastaj sot në mëngjes edhe me shkrim, ka dhënë urdhëresë për obduksion të trupit të pajetë të fëmijës.”, - thuhet në komunikatën e Prokurorisë Themelore Publike në Tetovë. 

 

Ende është e panjohur se si e kanë lëshuar trupin e pajetë të vajzës shtatëvjeçare, ku kishte urdhër për obduksion nga prokurori i rastit. Kurse nga SPB-ja e Tetovës, me komunikatë me shkrim janë përgjigjur se deri tek lajmërimi i rastit, ka ardhur si pasojë e lajmërimit për dëmtim të pronës së spitalit nga ana e familjarit, tani më të ndjerës.

 

“Më 21.09.2025 në SPB - Tetovë, nga Spitali Klinik i Tetovës është raportuar se një vajzë tetëvjeçare ishte sjellë pa shenja jete në Repartin e Anestezisë, pasi më parë kishte qenë në Repartin e Pediatrisë në të njëjtin spital. Menjëherë është vepruar sipas raportit dhe u njoftua prokurori publik, i cili konstatoi se familja nuk kishte lejuar kryerjen e autopsisë dhe e kishte marrë trupin e vajzës për varrim. Në bashkëpunim me prokurorin publik, po ndërmerren masa për zbardhjen dhe dokumentimin e plotë të rastit.”, - thuhet në komunikatën e SPB – Tetovë. 

 

Mbetet të shihen se cilat do të jenë hapat e institucioneve përgjegjëse për rastin në fjalë. Ndërkohë vetëm brenda disa muajsh, në Spitalin Klinik të Tetovës, në rrethana ende të paqarta, kanë ndërruar jetë dy fëmijë.