Hoxha: Dronë serbë kanë fluturuar mbi veriun e Kosovës

 

“Kohën e fundit kemi pasur fluturime të dronëve që ne po dyshojmë që po vijnë nga territori i Serbisë në pjesën veriore të Kosovës. Policia është në kontakt me KFOR-in, jemi duke bërë monitorimin dhe për të parë se çfarë mund të bëhet.”, - deklaroi drejtori i Policisë së Kosovës, Gazmend Hoxha.

 

Hoxha megjithatë thotë se kjo paraqet rrezik për pjesën e kufirit, por jo për qytetarët, të cilët mbrohen nga institucionet.

 

“Është e rrezikshme për pjesën e kufirit, po, por për qytetarët tanë në jug, ne jemi duke i mbrojtur po ashtu. Ndërsa hapësira ajrore është përgjegjësi e KFOR-it.”, - theksoi drejtori i Policisë së Kosovës, Gazmend Hoxha.

 

Drejtori i Policisë, Hoxha, tha se institucionet ndërkombëtare janë njoftuar për këtë situatë dhe KFOR-i është duke punuar në këtë drejtim. Shkelja e hapësirave ajrore të Kosovës nga dronë të Serbisë është konfirmuar ditë më parë edhe nga ministri në detyrë i Brendshëm, Xhelal Sveçla.