KShZ-ja e mbylli Listën Zgjedhore, të drejtë vote kanë 1.832.415 votues

 

“Komisioni Shtetëror Zgjedhor e mbyll Listën Zgjedhore për realizimin e zgjedhjeve për këshillat e komunave dhe Këshillin e Qytetit të Shkupit, si dhe për kryetarë komunash dhe kryetarin e Qytetit të Shkupit, që do të mbahen më 19 tetor 2025. Qytetarët nënshkruhen në një Listë Zgjedhore dhe votojnë në zgjedhjet lokale. Pra, ekziston vetëm një listë zgjedhore në vendvotimet për zgjedhjet lokale.”, - deklaroi kryetari i KShZ-së, Boris Kondarko. 

 

Siç u sqarua nga anëtari i KShZ-së, Angellço Ristov, në shtet janë konstatuar 3.480 vendvotime, prej të cilave në 132 vendvotime janë nënshkruar më pak se dhjetë votues. Votimi për ta do të mbahet në vendvotimin më të afërt.

 

“Në propozim-udhëzim, në mënyrë taksative janë cekur të gjitha komisionet komunale zgjedhore dhe të gjitha vendvotimet në të cilat janë regjistruar më pak se dhjetë votues, ku nuk do të votohet në atë vendvotim, por në vendvotimet e cekura votimin do ta mbajë këshilli më i afërt nga vendvotimi më i afërt i vendvotimit të cekur. Komisionet komunale zgjedhore nuk do të dërgojnë këshilla votues dhe votuesit e njëjtë do ta realizojnë të drejtën e votës në vendvotimin më të afërt me mbi dhjetë votues të regjistruar.”, - theksoi anëtari i KShZ-së, Angellço Ristov. 

 

Në një seancë para disa ditësh, KShZ-ja përmes shortit përcaktoi renditjen në fletëvotim për zgjedhjet lokale. Në nëntë vendet e para të fletëvotimit janë partitë dhe koalicionet parlamentare. Numrat rendorë nga 10 deri 33 do t’u takojnë partive dhe koalicioneve joparlamentare, ndërsa listat e pavarura të kandidatëve në fletëvotim do të jenë me numrat rendorë nga 34 deri 153.