Pas dronëve rusë në hapësirat e Evropës, NATO-ja forcon praninë në Detin Baltik

 

"Kam qenë gjithmonë i mendimit që evropianët duhet të angazhohen më shumë. Kam dashur që ne, Shtetet e Bashkuara, të ndalojmë së derdhuri para dhe armë në një konflikt kaq të largët, kur ndjeja se evropianët me gjithë respektin nuk po merrnin përsipër barrën që u takon. Tani evropianët po blejnë armë nga ShBA-ja, në vend që t’ua japim falas.”, - deklaroi zëvendëspresidenti i ShBA-së, J.D. Vance.

 

Presidenti ukrainas gjithashtu akuzoi Rusinë se ka refuzuar të gjitha propozimet e mirëfillta për paqe, prandaj sipas tij, ndaj Rusisë duhet ushtruar presion më i madh ndërkombëtar.

 

"Informacionet e inteligjencës tregojnë se rusët po përdorin cisterna të kamufluara për të lëshuar dhe drejtuar dronë kundër vendeve evropiane. Kjo është një provë tjetër pse Deti Baltik dhe detet e tjera duhet të mbyllen për cisternat ruse të paktën për flotën e tyre të padukshme.", - theksoi presidenti i Ukrainës, Volodimir Zelenski.

 

Pas dronëve të dyshimtë janë shtuar masat e sigurisë në Evropë. Si reagim ndaj rritjes së kërcënimeve, NATO-ja ka vendosur të forcojë praninë e saj në Detin Baltik, duke dërguar një fregatë për mbrojtje ajrore dhe mjete shtesë për mbikëqyrje dhe vëzhgim. Ndërkohë, ministri i Jashtëm rus ka mohuar akuzat për shkelje të qëllimshme të hapësirave ajrore të vendeve të NATO-s dhe BE-së, por ka pranuar se incidente të tilla ndodhin herë pas herë.