Më 27-28 maj Vuçiq në Tiranë, zbardhet agjenda dy ditore

Konfirmimi është bërë sot nga zyra e shtypit e Kryeministrisë shqiptare, e cila, ka zbardhur edhe një pjesë të agjendës së vizitës së kryeministrit serb Aleksandër Vuçiq në Tiranë. 

 

Mësohet se për Vuçiq do të ketë pritje zyrtare në Pallatin e Brigadave; e ngjashme nga përmasat me atë që kryeministri Vuçiq i bëri Ramës më 10 nëntor 2014.

 

Sipas agjendës zyrtare, Kryeministri serb Aleksandër Vuçiq do të mbërrjë në Tiranë më 27 maj, në orën11:00.

 

Ai do të pritet në aeroport dhe më pas do të zhvillohet ceremonia e mirëseardhjes në Pallatin e Brigadave.

 

Pas ceremonisë së pritjes, do të ketë edhe një konferencë të përbashkët për shtyp, ku mësohet se do të kufizohen edhe pyetjet nga mediat; do të lejohen vetëm 2 pyetje nga mediat shqiptare dhe dy pyetje nga mediat serbe.

 

Zyra e shtypit e Kryeministrisë shqiptare, bën të ditur se arsyeja e vizitës së Vuçiq në Tiranë është një vizitë kthimi, pas vizitës që pati kryeministri shqiptar Rama në muajin nëntor në Beograd.