Strugë, viti i ri shkollor nis pa libra

 

 

“Ky vit shkollor ka filluar me munges te librave.“Mungesa e librave lidhet me faktin që,sipas konceptit të ri, tani fëmijët vazhdojnë në të njëjtin koncept deri në klasën e shtatë. Nga ministira e arsimit ka njoftuar se të gjitha librat e klasës së shtatë do të jenë libra të rinj dhe nuk duhet të punohet më me librat e vjetër, që i përkisnin konceptit të mëparshëm. E njëjta gjë vlen edhe për klasën e gjashtë. Megjithatë, kemi filluar me një bazë, edhe pse arsimtarët po përballen me sfida, sepse jo të gjithë librat kanë mbërritur në kohën e duhur”, u shpreh drejtoresha Albana Cufaj Zhuta.

 

Sipas drejtoreshës, vonesat në shpërndarjen e librave janë vërejtur që nga fillimi i vitit shkollor, ndërsa mësimdhënësit po angazhohen të realizojnë mësimin sipas programeve të miratuara, pavarësisht mungesave të materialeve.

 

“Sfidat e arsimtarëve lidhen me faktin se duhet të punojnë me planprograme të miratuara nga Byroja për Zhvillim të Arsimit, të gjejnë mënyra për të organizuar orët e mësimit. Ne paralelet shqiptare , mungesat e librave janë të mëdha. Edhe në paralelët maqedonase ka probleme, ndërsa tek paralelet turke, për shkak se kanë më pak nxënës, situata është pak më e mirë dhe mungesat janë më të vogla”, theksoi drejtoresha Zhuta.

 

Nga Ministria e Arsimit ende nuk është dhënë një afat i saktë për përfundimin e shpërndarjes së librave, ndërsa në shumë shkolla mësimi po zhvillohet me materiale të përkohshme dhe ndihma digjitale.