Lindja e mesme, Hamasi do të dorëzojë pengjet izraelite nesër

 

"Ne jemi të përgatitur për çdo zhvillim, mbetemi vigjilentë dhe gati për veprim derisa të kthehen të gjithë pengjet tona", u shpreh komandanti i ushtrisë izraelite.

 

Rreth 200 trupa amerikane kanë mbërritur në Izrael për të monitoruar armëpushimin dhe për të ofruar mbështetje humanitare dhe logjistike. Shpërndarja e ndihmave ka filluar në Gaza, ndërsa rrënojat po pastrohen në të gjithë rripin. Rreth gjysmë milioni njerëz janë kthyer deri më tani, duke qenë dëshmitarë të shkatërrimit.

 

"Nuk e di se si do të jetojmë. Pa ujë, pa energji elektrike, pa shtëpi dhe rrugë", theksoi banori i Khan Yunis, Mohammad Abu Rish.

 

"Khan Younis është shkatërruar. Kjo zonë nuk është më e përshtatshme për njerëz. Nuk ka vend as për një tendë", u shpreh banori i Khan Yunis, Azmi Al-Akkad.

 

Mbrëmë në në Tel Aviv u mbajt një tubim i madh,ku mori pjesë i dërguari special i SHBA-së, Witkoff, i shoqëruar nga vajza e Trump, Ivanka, dhe bashkëshorti i saj, Kushner.

 

"Ne të gjithë i kemi një borxh të thellë mirënjohjeje Presidentit Trump për refuzimin e pranimit të idesë se paqja në Lindjen e Mesme është e paarritshme. Guximi juaj ka prekur botën, dhe mua gjithashtu. Për pengjet - vëllezërit dhe motrat tona, ju po ktheheni në shtëpi", theksoi i dërguari special i presidentit Donald Trump, Steve Witkof.

 

Ministri izraelit i Mbrojtjes, Katz, njoftoi se lirimi i pengjeve do të pasohet nga një operacion për shkatërrimin e tuneleve të Hamasit, i cili do të kryhet nga forcat izraelite dhe një mekanizëm ndërkombëtar i udhëhequr nga Shtetet e Bashkuara.

 

Një samit paqeje për t'i dhënë fund konfliktit do të mbahet nesër në Egjipt, ku do të marrin pjesë liderë botërorë, përfshirë Trump, Macron, Starmer dhe Guteresh.