Festë ne Tel Aviv, Hamasi liroi të gjitha pengjet izraelite

 

“Shpresojmë që të gjithë të kthehen. Kjo është ditë e re që e kthen jetën tonë në normalitet. Kjo ditë për ne është shumë e rëndësishme. Zgjati dy vjet, por tani është koha për t’u kthyer në jetën normale.”, - tha djali i një pengu të liruar, Omri Lifszyc.

 

“Jam shumë, shumë i lumtur, më është hequr një barrë e madhe. Mendoj se kjo mund të shihet në të gjithë sheshin. Populli izraelit është i lumtur. Është një mëngjes i veçantë, ndoshta mëngjesi që do ta ndryshojë mënyrën se si kemi jetuar deri tani në këtë vend.”, - tha vëllai i një pengu të liruar, Gili Roman.

 

“Kemi kaluar dy vite shumë të vështira dhe të dhimbshme, kemi qenë pranë familjes së tyre në çdo moment. Tani mezi presim ta shohim Elkanan tonë.”, - u shpreh miku u pengut, Elkana Bohbot, Shlomi Menashe. 

 

Për kryeministrin izraelit, Benjamin Netanjahu, kjo është një ditë historike që shumëkush nuk besonte se do të vinte.

 

“Ky është një moment historik për të cilin shumë nuk besonin se do të ndodhte. Por, luftëtarët tanë besuan. Edhe unë besoja.”, - deklaroi kryeministri i Izraelit, Benjamin Netanjahu.

 

I pranishëm në Izrael ishte edhe presidenti Tramp, ku mbajti një fjalim në parlamentin izraelit, Kneset, dhe më pas Trampi do të udhëtojë drejt Egjiptit për samitin e paqes, që ai e kryeson së bashku me presidentin egjiptian, ku po diskutohet marrëveshja për armëpushim mes Izraelit dhe Hamasit.

 

“Kjo është një ditë e madhe, një fillim i ri dhe mendoj se nuk ka pasur ndonjë ngjarje të tillë, nuk kam parë kurrë diçka të tillë. Jemi shumë të lumtur për pengjet e liruar.”, - theksoi presidenti i ShBA-së, Donald Tramp.

 

Trampi gjithashtu u shpreh se lufta në Gazë zyrtarisht ka përfunduar. Sipas marrëveshjes, Hamasi gjithashtu dorëzon edhe mbetjet mortore të 28 personave të tjerë. Në këmbim, Izraeli do të lirojë rreth 2.000 të burgosur dhe të ndaluar palestinezë.