Një shpullë për “diktatorin” Orban

“Shakaja është gjysma e së vërtetës”. Duket se kështu e mendon edhe Presidenti i Komisionit Europian, Zhan Klod Junker, i cili ka shpikur mënyrën e tij për të përshendetur një nga udhëheqësit, që i ka shkaktuar jo pak telashe.

 

Ai ka përdorur  fjalën “diktator” për Kryeministrin hungarez Viktor Orban, kur ai mbërriti në samitin e Rigës.

 

“Ja ku po vjen diktatori”, dëgjohet të thotë ai, ndërsa Orban po afrohej. Më pas ia përsëriti në sy, i jep atij dorën dhe e qëllon butësisht në faqe.

 

Reagimi i Orban ishte një buzeqeshje, ndoshta i mësuar me Junkerin, sepse sipas disa zyrtarëve europianë, nuk është hera e parë që Junkeri ia thotë në sy, por kësaj herë është rregjistruar në kamera.

 

Politikani i krahut të djathtë Viktor Orban, në pushtet prej 2010 në Hungari, ka paraqitur një sërë reformash, të cilat, sipas zyrtarëve perëndimorë, bien ndesh me të drejtat e njeriut.

 

Iniciativa e tij e fundit është kthimi i dënimit me vdekje Hungari, ku është ndaluar prej vitit 1990.

 

Bashkë me Kryeministri grek, Aleksis Cipras, ai është një nga politikanët që kryeson listën e publikuar nga gazeta gjermane “Der Spiegel”, për politikanët më të rrezikshëm në Europë.